Աշտարակի Օրգով գյուղի Արփի Թրպանճյանի անվան միջնակարգ դպրոցի 12-ամյա աշակերտը դպրոցական էքսկուրսիայից հետո հայտնվել է հիվանդանոցում։
«Ձեռքդ տուր» համայնքային զարգացման հասարակական կազմակերպության նախագահ Կարինե Թորոսյանն ահազանգում է՝ երեխայի օրգանիզմում հայտնաբերվել է թմրամիջոց։
«Ըստ առկա տվյալների՝ խոսքը բարձր դոզայի մասին է, իսկ երեխան այս պահին գտնվում է հիվանդանոցում՝ ծանր վիճակում և հիշողության կորստով։ Ընդ որում, բժիշկները փաստել են, որ երեխան առաջին անգամ է օգտագործել։ Ենթադրվում է՝ քաղցրի միջոցով է փոխանցվել երեխային»,- նշել է Թորոսյանը։
Նա դիմել է ՀՀ ներքին գործերի նախարար Արփինե Սարգսյանին. «Քանի՞ երեխա պետք է հայտնվի հիվանդանոցում, որպեսզի հասկանանք, որ սա արդեն ոչ թե առանձին դեպք է, այլ ահազանգ ամբողջ հասարակության համար»։
Թորոսյանը պահանջում է գործն անհապաղ վերցնել հատուկ վերահսկողության տակ, բացահայտել դեպքի բոլոր հանգամանքները, հայտնաբերել թմրամիջոցի աղբյուրը և օրենքի ամբողջ խստությամբ պատժել բոլոր մեղավորներին։
Ներքին գործերի նախարարի մամուլի խոսնակ Նարեկ Սարգսյանն արձագանքել է հրապարակմանը՝ նշելով, որ հաղորդումը ստացել են, միջոցառումներ են իրականացվում։
«Դեպքը ՆԳՆ ոստիկանության ղեկավարության կողմից հսկողության տակ է: Հավելյալ տեղեկություն ունենալուն պես՝ կհայտնեմ»,- նշել է ՆԳՆ խոսնակը։
