Մինչ ՀՀ իշխանությունները հերքում են «300 հազար ադրբեջանցիների վերադարձի» հնարավորությունները, Բաքվում մեկնարկել է «Վերադարձը Արևմտյան Ադրբեջան՝ որպես ազգային գաղափարի նոր փուլ» թեմայով առաջին միջազգային գիտական կոնֆերանսը։ Ինչպես հայտնում են ադրբեջանական ԶԼՄ-ները՝ կոնֆերանսը կազմակերպվել է Բաքվի պետական համալսարանի և «Արևմտյան Ադրբեջանի համայնք» կոչված կազմակերպության կողմից։
Լրատվականների փոխանցմամբ՝ կոնֆերանսում կքննարկվեն Հայաստանի ինքնիշխան տարածքներ՝ Ադրբեջանի կողմից հորինված եզրույթով ասված «Արևմտյան Ադրբեջան» վերադարձի ասպեկտները և «դրա նշանակությունը տարածաշրջանային խաղաղության և անվտանգության համար»։
Նշվում է, որ «վերադարձի» հայեցակարգը կքննարկվի «միջազգային իրավունքի համատեքստում՝ որպես ազգային գաղափարի զարգացման փուլ»։
«Կոնֆերանսում նաև կվերլուծվի Արևմտյան Ադրբեջանից արտաքսված ադրբեջանցիների վերադարձի իրավունքի իրավական շրջանակը»։
