Այսօր Նիկոլ Փաշինյանը հատեց բոլոր սահմանները։ Սկզբում Նիկոլ Փաշինյանը մետրոյում թիրախավորեց արցախցի կնոջը՝ իր երեխայի հետ։ Այսօր նա թիրախավորեց նաև բուժաշխատող Արփինե Սողոյանին, ով անհետ կորած Հրանտ Պապիկյանի քույրն է։
Մեզանից յուրաքանչյուրը կարող է լինել Նիկոլ Փաշինյանի հաջորդ զոհը։ Սիրելի՛ հայրենակիցներ, հասկացեք, թե ինչ է կատարվում։ Մեզանից արդեն խլում են կարծիք արտահայտելու իրավունքը, խոսքի ազատությունը, կնոջ նկատմամբ հարգանքը։
Երևանի փողոցներով շրջում էր հայրենիքի գողերի մի փոքրիկ խմբակ։ Այս խմբակը քարոզարշավի ընթացքում որևէ ծրագիր չունի ներկայացնելու։ Մինչդեռ Սամվել Կարապետյանը ներկայացնում է բազմաթիվ ծրագրեր, և արդեն ավանդույթ է դարձել, որ ամեն շաբաթ դրանց ավելանում են նոր, հեղափոխական նախաձեռնություններ։
Դրանց թվում են՝
• 1 միլիարդ դոլարի ներդրում զբոսաշրջության ոլորտի զարգացման համար,
• 150 միլիարդ դրամ՝ ծայրահեղ աղքատությունը վերացնելու նպատակով,
• չորս երեխա ունեցող ընտանիքներին՝ 2 միլիոն դրամ միանվագ աջակցություն,
• հինգերորդ երեխայի դեպքում՝ բնակարանի տրամադրում։
Անձրևները գալիս են մաքրելու։ Այն նաև փոփոխությունների խորհրդանիշ է։ Գալիս է մարդասիրության ժամանակը, գալիս է համախմբման ժամանակը, գալիս է իրավունքի գերակայության ժամանակը։ Այլևս որևէ չինովնիկ մատ թափ տալով չի խոսելու ժողովրդի հետ։
Այսօր շրջել ենք ամբողջ Էրեբունի վարչական շրջանով, եղել ենք նաև Նուբարաշենում և զգացել մեր հայրենակիցների դրական տրամադրությունն ու փոփոխությունների հանդեպ հույսը։ Այդ հույսը մեզ պարտավորեցնում է։
Գիտե՞ք՝ ինչու։ Որովհետև մեր երկիրը պետք է ունենա լուրջ ղեկավար։ Մեր երկրի ղեկավարը չպետք է լինի այնպիսի մարդ, որի վրա նայելով՝ մենք ամաչենք ասել, որ նա Հայաստանի վարչապետն է։
