Արդեն շուրջ երկու ամիս է, ինչ Երևանի խոշոր կրթական օջախներից երկուսի՝ թիվ 181 հիմնական դպրոցի և Մխիթար Սեբաստացի կրթահամալիրի մայր դպրոցի տարածքներում շարունակվում է կեղտաջրերի անարգել հոսքը՝ տարածելով սուր և տհաճ գարշահոտ։ Այս երկու կրթական հաստատություններում միասին սովորում է շուրջ 4000 աշակերտ, որոնք ստիպված են ամեն օր դպրոց հաճախել հակասանիտարական պայմաններում՝ շնչելով կեղտաջրերի հոտը և տեղաշարժվելով աղտոտված տարածքով։
Ինչպես հայտնում է ֆոտոլրագրող Գագիկ Շամշյանը, «Վեոլիա ջուր» ընկերությունը մի քանի անգամ փորձել է կարգավորել խնդիրը․ փոխվել են դիտահորեր, տեղադրվել նորերը, իրականացվել են որոշակի աշխատանքներ։ Սակայն, չնայած այդ քայլերին, կեղտաջրերի հոսքը չի դադարել, ավելին՝ իրավիճակը գնալով ավելի է վատթարանում։
SHAMSHYAN.com-ի թղթակցի հետ զրույցում երեխաներին դպրոցից տուն տանող ծնողները, ովքեր չցանկացան տեսախցիկի առաջ խոսել, նշում էին․
«Եկան, ինչ-որ աշխատանքներ արեցին, բայց արդյունքը զրոյական է։ Մեր աչքին պարզապես փոշի փչեցին ու հեռացան։ Իսկ Մալաթիա-Սեբաստիա վարչական շրջանի ղեկավարին, կարծես, այս խնդիրը չի հետաքրքրում։ Թող գոնե մեկ անգամ դուրս գա իր աշխատասենյակից ու տեսնի՝ ինչ պայմաններում են երեխաները դպրոց գնում»։
Ծնողները նաև ընդգծում են, որ գարնանային այս օրերին մարդիկ զրկված են բնական միջավայրում զբոսնելու հնարավորությունից․
«Երեկոյան ժամերին մարդիկ դուրս են գալիս զբոսնելու, բայց տարածքում այնպիսի անտանելի հոտ է, որ անհնար է երկար մնալ։ Դպրոցներում էլ չեն կարողանում պատուհանները բացել, քանի որ գարշահոտը լցվում է դասարաններ»։
Բնակիչները և ծնողները պահանջում են, որպեսզի պատասխանատու կառույցները վերջապես ձեռնարկեն արդյունավետ և վերջնական քայլեր՝ խնդիրը լուծելու համար՝ հաշվի առնելով երեխաների առողջության և բնականոն կրթական գործընթացի ապահովման առաջնահերթությունը։
Ինչպես ավելի վաղ հայտնել էր SHAMSHYAN.com-ը, արդեն մոտ մեկ ամիս է՝ Երևան քաղաքի թիվ 181 հիմնական դպրոցի հարևանությամբ կեղտաջրերը դուրս են գալիս և տարածվում ամբողջ դպրոցի բակով՝ հոսելով մինչև «Մխիթար Սեբաստացի» կրթահամալիր, ապա հասնելով Բաբաջանյան փողոց։
Խնդրի մասին բնակիչները բազմիցս տեղեկացրել են թե՛ Երևանի քաղաքապետարանին, թե՛ Մալաթիա-Սեբաստիա վարչական շրջանի ղեկավարի աշխատակազմին, ինչպես նաև «Վեոլիա Ջուր» ընկերությանը, սակայն մինչ օրս խնդիրը լուծում չի ստացել։
Մարտի 17-ին ֆոտոլրագրող Գագիկ Շամշյանի հետ զրույցում բնակիչները, ովքեր չէին ցանկացել տեսախցիկի առաջ խոսել, նշել էին․
«Արդեն մեկ ամիս է՝ ստիպված ենք այս ճանապարհով տեղաշարժվել։ Երեխաները գնում են դպրոց, իսկ մենք ստիպված ենք շնչել այս գարշահոտը։ Այնքան ենք զանգել տարբեր կառույցների, որ արդեն մեր համարներին էլ չեն պատասխանում։ Հատկապես առավոտյան և երեկոյան կեղտաջրերի հոսքը ուժեղանում է, և ընդհանրապես անցնելու տեղ չի լինում»։
Երեխաներն էլ կես կատակ, կես լուրջ ասում էին, թե եթե պատկան մարմինները չեն վերացնում կեղտաջրերը, ապա գուցե պատճառը այն է, որ սա «Թրամփի ուղին» է, որը կապում է երկու դպրոցները։
