Վերջին օրերին աննախադեպ բարձրացել է հեղուկ գազի արժեքը՝ 180-190 դրամից հասնելով մինչև 250 դրամի։ Այս մասին ֆեյսբուքյան իր էջում գրել է ԱԺ «Հայաստան» խմբակցության պատգամավոր Գառնիկ Դանիելյանը։
«Սա այն դեպքում, երբ, օրինակ, Ռուսաստանի Դաշնությունում հեղուկ գազի գինը ներկա պահին 100 դրամ է:
Մինչ կառավարության անդամները փորձում են գնաճը կապել աշխարհաքաղաքական իրադարձությունների, մասնավորապես՝ Իրանում տեղի ունեցողի հետ կամ պայմանավորել եղանակային պայմաններով, մասնագետներն ու քաղաքացիները ունեն մտավախություններ, որ գործ ունենք արհեստական դեֆիցիտի առաջացման հետ, ինչի նպատակը ադրբեջանական բենզինի իրացումն է։
Այսօր էլ վարչապետի աթոռը զբաղեցնողը հանդարտությամբ հայտարարեց, որ շուկան ինքն իրեն կկարգավորվի՝ տպավորություն ստեղծելով, որ կառավարությունը որևէ անելիք չունի այս առումով։
Գնաճի պատճառները պարզելու ուղղությամբ պատշաճ ուսումնասիրություն պետք է իրականացնի և այն հանրայնացնի Մրցակցության պաշտպանության հանձնաժողովը, և ոչ հանձնաժողովի նախագահի կողմից տրվի անորոշ բացատրություն, թե թանկացման պատճառը եղանակն է կամ լոգիստիկ խնդիրները, և որ այն օրինաչափ է, ունի սեզոնային բնույթ։
Ի դեպ, քաղաքացիներից ստանում ենք ահազանգեր, որ Հանրապետության մի շարք լցակայաններում թերլիցքավորման դեպքեր են տեղի ունենում։ Այս հարցը ևս պետք է լինի ՄՊՀ-ի ուշադրության կենտրոնում։
Անթույլատրելի է նման սրընթաց թանկացումը, ինչը, վստահաբար ազդելու է մեր քաղաքացիների, և ոչ՝ ադրբեջանական բենզին ներկրող օլիգարխների կամ 9 միլիոն պարգևավճար ստացող նախարարների կյանքի որակի վրա»,-գրել է նա։
