Դեկտեմբերի 25-ից մինչև այսօր, Հայաստանի քաղաքացիների գրպանում տասնյակ միլիարդ դրամներ են մնացել։ Այս մասին այսօր՝ հունվարի 14–ին, «Հայաստանը և խաղաղությունը ռիսկերի ու հնարավորությունների խաչմերուկում» խորագրով ՄԱՀՀԻ անվտանգային ֆորումի շրջանակում իր խոսքում նշեց վարչապետ Նիկոլ Փաշինյանը՝ անդրադառնալով Ադրբեջանից բենզինի ու դիզվառելիքի ներկրման փաստին։
«Իհարկե, ես չեմ հաշվել, հիմա չնստեն, ասեն՝ տասնյակ միլիարդ չի, 9 միլիարդ 876 միլիոն է, բայց դրանից հարցի էությունը չի փոխվում։
Ես ուզում եմ բոլորիս շնորհավորել էս հանգրվանի առիթով։ Երեկ տեսա, ասում են՝ բենզինի համար Եռաբլուրը մոռացաք, էս մոռացաք, էն մոռացաք։ Ոչ, այդպես չի, որովհետև ես ասում եմ, որ զարգացած, կայուն, անվտանգ, միջազգային բարձր հեղինակություն ունեցող Հայաստանի Հանրապետությունը, ամենամեծ հարգանքի տուրքն է մեր մեր նահատակներին, մեր ընկած եղբայրներին։
Եվ ես դեռ 2021 թվականի Հանրապետության հրապարակում սեպտեմբերի 21-ի ունեցած իմ ելույթում ասել եմ, որ մեր եղբայրները ընկել են, որ Հայաստանի Հանրապետությունը ոտքի կանգնի, և Հայաստանի Հանրապետությունը ոտքի է կանգնում, և կարող եմ ասել՝ ոտքի են կանգնել, որպես միջազգային հանրության պատասխանատու մասնակից, որպես արժանապատիվ գործընկեր, այդ թվում մեր միջազգային գերտերությունների հետ»,– ընդգծեց Փաշինյանը։
