Այն, ինչ կատարվում է վերջին օրերին, այլևս պարզապես «միջամտություն» չէ. սա բացահայտ պատերազմի հայտարարություն է Հայ Առաքելական Սուրբ Եկեղեցու, մեր ազգային ինքնության և պետականության հիմքերի դեմ։ 2026 թ. հունվարի 4–6-ին Նիկոլ Փաշինյանի և մի խումբ դավաճան հոգևորականների կողմից բեմադրված թատրոնը՝ այսպես կոչված «Համակարգող խորհրդի» ստեղծումը, ոչ այլ ինչ է, քան հակականոնական և հակասահմանադրական հեղաշրջման փորձ եկեղեցու ներսում։
Մենք հայտարարում ենք առանց երկիմաստության. սա պետական դավաճանությանը հավասարազոր քայլ է հոգևոր հարթության վրա։ Փորձ է արվում գլխատել Հայոց Եկեղեցին, զրոյացնել Ամենայն Հայոց Կաթողիկոսի ինստիտուտը և եկեղեցին վերածել կառավարությանը կից «գրասենյակի»։ Սա ոտնձգություն է դարավոր սրբությունների դեմ, որը հղի է ազգային պառակտման և եղբայրասպան բախումների անդառնալի վտանգով։
Դատապարտում ենք իշխանության ցինիզմը, անընդունելի և անբարոյական ենք համարում պետության ղեկավարի այն հայտարարությունները, որոնք քաղաքացիներին դրդում են պղծել եկեղեցական ծիսակարգը։ Սա հոգևոր ահաբեկչություն է սեփական ժողովրդի հավատքի նկատմամբ։ Պետություն-եկեղեցի սահմանները ջնջելու փորձերը տանում են դեպի բռնապետություն, որտեղ անգամ մարդու խիղճն ու հավատքը պետք է ենթարկվեն քաղաքական կոնյունկտուրային։
Առանձնակի զզվանքով ենք արձանագրում այն տիրադավ ու ուխտադրուժ հոգևորականների վարքագիծը, ովքեր, մոռանալով Աստծո առաջ տված իրենց երդումը, դարձել են քաղաքական պատվեր կատարող գործիքներ։ Շվեյցարիայի թեմի առաջնորդական տեղապահ Տեր Գուսան ծայրագույն վարդապետ Ալճանյանի քայլը՝ միանալ այս խամաճիկային խորհրդին, գնահատում ենք որպես հուդայական դավաճանություն։ Ձեր հիմարության վարկածին հավատացողներ չկան, դուք շատ լավ հասկանում եք, որ ընդունելով հերձվածող «ճանապարհային քարտեզը»՝ դուք ոչ թե բարենորոգում եք, այլ հարվածում եք Մայր Եկեղեցու թիկունքին։ Պատմությունը և սերունդները չեն ներելու այս ուրացումը։
ՄԵՐ ՊԱՀԱՆՋԸ ՀՍՏԱԿ Է ԵՎ ՎԵՐՋՆԱԿԱՆ.
ա. Նիկոլ Փաշինյանին և նրա վարչախմբին՝ ՁԵՌՔԵՐԴ ՀԵՌՈ՛Ւ ՀԱՅՈՑ ԵԿԵՂԵՑՈՒՑ։ Դադարեցրե՛ք կեղտոտ խաղերը և պետական լծակների կիրառումը հոգևոր կառույցի դեմ։ Ձեր ամեն մի քայլը, որն ուղղված է եկեղեցու պառակտմանը, արձանագրվում է որպես հանցագործություն պետականության դեմ։
բ. Սթափության կոչ հոգևորականներին. դու՛րս եկեք այդ «ինքնահռչակ» խմբակից, քանի դեռ ուշ չէ։ Մի՛ դարձեք հերձվածի պատճառ, մի՛ վաճառեք ձեր հոգին սատանային։ Հակառակ դեպքում՝ կրելու եք ողջ պատասխանատվությունը՝ թե՛ երկրային, թե՛ երկնային դատաստանի առաջ։
գ. Հայ ժողովրդին. ոտքի՛ կանգնեք։ Սա քաղաքականություն չէ, սա մեր տեսակի պահպանման կռիվն է։ Մեր լռությունը այսօր կլինի մեր կործանումը վաղը։ Թույլ չտա՛նք, որ ազգային դավաճանները պղծեն մեր հավատքի տաճարը։
Եկեղեցու դեմ ձեռք բարձրացնողը փլատակների տակ է մնալու։
Հայոց եկեղեցու պահպանության համահայկական խորհուրդ
