«2025 թվականը Հայաստանի համար եղել է հերթական դժվար տարին: Տնտեսական անորոշություններ, աճող պարտքեր, սոցիալական անարդարություն, օրենքի ոտնահարում, ամոթալի դավաճանություններ, բայց միաժամանակ տարի, երբ մեր հասարակությունը ցույց տվեց իր կենսունակությունը, մարդիկ շարունակեցին պայքարել, չհաշտվել, պահանջել, մենք գտանք նոր մարդկանց, նոր գաղափար, մեր ուժերն աճեցին հենց այս ֆոնի վրա։ Ընդամենը մի քանի օր հետո մենք մուտք ենք գործելու Հայաստանի պատմության համար ճակատագրական 2026 թվականը, որը որոշելու է մեր՝ որպես ազգի և պետականության ապագան։ Այսօր կխոսենք մեր ձևով ապագայի մասին, մենք ցույց կտանք պարզ պատկեր։ Մեր օրակարգը կառուցված է չորս հիմնական առանցքների շուրջ, չորս այն ուղղություններ, որոնք կորոշեն Հայաստանի ճակատագիրը: Առաջին` արդարությունը: Ինչպե՞ս վերադարձնել մեր հասարակությանը արդարության զգացումը, երբ արժանիքը, ոչ թե քծնանքը կորոշի մարդու ճակատագիրը: Երկրորդ՝ բարեկեցությունը: Ինչպե՞ս վերադարձնել Հայաստանը իսկապես բարեկեցիկ երկիր, որտեղ չկա աղքատություն, որտեղ յուրաքանչյուր ընտանիք ապահով է իրեն զգում: Երրորդ՝ խելամիտ արտաքին քաղաքականությունը: Ինչպե՞ս վերակառուցել մեր հարաբերությունները հարևանների ու գերտերությունների հետ առանց ուրանալու մեր շահերը: Եվ վերջապես չորրորդ՝ համերաշխը։ Ինչպե՞ս վերածնել մեր պառակտված հասարակությունը, դառնալ մի մեծ ընտանիք՝ իրար հանդեպ սիրով ու փոխադարձ հարգանքով: Այսօր մենք լսելու ենք Սամվել Կարապետյանին: Նրա տեսլականը հիմնված է կյանքի փորձի, արված գործերի և այն պատասխանատվության զգացման վրա, որը պետք է ունենար յուրաքանչյուր մարդ, ով պատրաստ է ղեկավարել երկիր»,- այս մասին «Մեր ձևով» ժողովրդական շարժման տարեկան ամփոփիչ հաշվետու ժողովի ժամանակ ասաց շարժման համակարգող խորհրդի անդամ Ալեքսան Ալեքսանյանը։
Մանրամասն՝ տեսանյութում։
