Ռուսաստանյան «Ռոսսոտրուդնիչեստվո», «Եվրասիա» կազմակերպությունները, ինչպես նաև Ռուսական հումանիտար առաքելությունը 2026 թ-ին կշարունակեն աջակցել Արցախից բռնի տեղահանված ու սոցիալական խոցելիություն ունեցող մեր հայրենակիցներին։ Այս մասին հայտնել է «Ռոսսոտրուդնիչեստվո» կազմակերպության փոխնախագահ Իգոր Չայկան։ «Լեռնային Ղարաբաղից տեղահանված անձանց աջակցությունը միանվագ նախաձեռնություն չէ, այլ հետևողական աշխատանք։
Այս նախագիծը նախատեսված է դժվարին իրավիճակներում գտնվող հազարավոր ընտանիքների համար։ Մենք տեսնում ենք, որ մարդիկ իսկապես կարիք ունեն այս օգնության, ուստի որոշել ենք երկարաձգել ծրագիրը մինչև 2026 թվականը և շարունակել մարդասիրական փաթեթներ տրամադրելը։ Մեզ համար կարևոր է ոչ միայն սնունդ և անհրաժեշտ պարագաներ տրամադրելը, այլև մարդկանց ապագայի նկատմամբ աջակցության և վստահության զգացում տալը՝ ցույց տալով, որ Ռուսաստանը նրանց կողքին է այս դժվարին ժամանակներում», – ասել է նա։
Ծրագիրն ամբողջապես ու հասցեական ավարտելու համար նախատեսված համայնքներում գնվելու է առնվազն 2000 լրացուցիչ փաթեթ, որոնք պարունակում են ընտանիքների համար անհրաժեշտ ապրանքներ և սննդամթերք, ինչպես նաև 500 փաթեթ երեխաների համար: Օգնություն կտրամադրվի մեծ ընտանիքներին, կերակրող չունեցող ընտանիքներին, խնամակալներ չունեցող ընտանիքներին և թոռների խնամքը ստանձնած տատիկ-պապիկներին: Հիշեցնենք, որ նախագծի առաջին և երկրորդ փուլերի ընթացքում՝ 2025 թվականին, տրամադրվել է 7310 մարդասիրական օգնության փաթեթ և 1000-ը՝ երեխաների համար։
Մինչ օրս աջակցություն է տրամադրվել ավելի քան 5000 ընտանիքի, որոնցից մոտ 700-ը ստացել են լրացուցիչ փաթեթներ փոքր երեխաների համար։ Այս լայնածավալ օգնության արշավը «Ռուսաստանը ձեզ հետ է» նախագծի մի մասն է, որը օտարերկրյա քաղաքացիներին իրազեկում է մեր երկրի միջազգային զարգացման օգնության ջանքերի մասին։
