Փաշինյանի՝ Գերմանիա այցի ընթացքում հայ համայնքի ներկայացուցիչները նախատեսում են բողոքի ակցիա իրականացնել։ «Փաստինֆո»-ի փոխանցմամբ՝ Գերմանահայոց կենտրոնական խորհրդի վարչության անդամ Սամվել Լուլուկյանն ասաց, որ Բեռլինում համայնքի հետ հանդիպում նախատեսված չէ, փոխարենը իրենք են նախաձեռնել ակցիայի իրականացումը։
«Այսօր ժամը 16:00 նախատեսված է հանդիպում Գերմանիայի կանցլերի հետ, որին ընդառաջ Գերմանահայոց կենտրոնական խորհրդի և մի շարք մարդու իրավունքների պաշտպանությամբ զբաղվող կազմակերպությունների ներկայացուցիչներ բողոքի ակցիա կիրականացնեն։
Մենք պահանջելու ենք դադարեցնել Հայ Առաքելական Եկեղեցու դեմ արշավը, ազատ արձակել քաղբանտարկյալներին, դադարեցնել Հայաստանում ժողովրդավարության և ազատ խոսքի դեմ ուղղված գործողությունները։
ՀՀ իշխանությունները, սահմանադրությամբ, իրավասու չեն միջամտել եկեղեցու ներքին կյանքին։ Մենք պահանջելու ենք դադարեցնել Հայ Առաքելական Եկեղեցու դեմ ճնշումները, միաժամանակ փորձելու ենք ուշադրություն հրավիրել Հայաստանի ներքին կյանքում առկա խնդիրներին և բռնաճնշումներին։
Մենք նաև նամակ ենք հղել Գերմանիայի կանցլերին, որով հայտնում ենք մեր խորը կասկածները, որ հայկական իշխանությունները բավարար չափով չեն զբաղվում Բաքվում պահվող հայ գերիների իրավունքների պաշտպանությամբ, և խնդրելու ենք կանցլերին զբաղվել այս խնդրով»,- ասաց Լուլուկյանը։
