Հայաստանն աջակցել է ՄԱԿ-ի Գլխավոր ասամբլեայի բանաձևին, որը կոչ է անում դադարեցնել ԱՄՆ-ի կողմից Կուբայի նկատմամբ սահմանված տնտեսական շրջափակումը։
Նշենք՝ ՄԱԿ-ի Գլխավոր ասամբլեան 33-րդ անգամ բանաձև է ընդունել՝ կոչ անելով ԱՄՆ-ին չեղարկել Կուբայի դեմ պատժամիջոցները։ Կուբայի դեմ ԱՄՆ-ի սահմանած տնտեսական, առևտրային և ֆինանսական շրջափակման դադարեցման բանաձևին աջակցել է 165 պետություն: Դեմ է քվեարկել միայն յոթ երկիր, ձեռնպահ է մնացել 12-ը։ Դեմ քվեարկողների թվում են Հունգարիան, Իսրայելը, Արգենտինան, Ուկրաինան և ԱՄՆ-ը:
ԱՄՆ-ն Կուբայի հետ դիվանագիտական հարաբերությունները խզել է 1961 թվականին՝ ի պատասխան կղզի պետության կողմից ամերիկյան ունեցվածքի ազգայնացման։ 1962 թվականին Վաշինգտոնը Կուբայի նկատմամբ առևտրատնտեսական էմբարգո է հայտարարել։
1992 թվականից սկսած՝ Կուբան ամեն տարի ՄԱԿ ԳԱ-ին է ներկայացնում ԱՄՆ-ի էմբարգոն չեղարկելու անհրաժեշտության մասին բանաձևի նախագիծը։ Միջազգային կազմակերպության անդամ երկրների ճնշող մեծամասնությունը մշտապես «կողմ» է քվեարկում փաստաթղթին։
