Խորհրդային Միության փլուզումից հետո Հայաստանի Հանրապետության տարածքի սեփականատերն առանձին անձեր չեն եղել. հողերը պատկանում են բացառապես պետությանը, իսկ դրանց բաշխումը որոշվում է կառավարության և օրենսդիր մարմնի կողմից: Այս մասին հոկտեմբերի 28-ին լրագրողների հետ հանդիպման ժամանակ նշեց Կադաստրի կոմիտեի նախագահ Սուրեն Թովմասյանը:
Նրա խոսքով, Հովհաննավանք վանքին և հարակից շենքերին ու հողամասերին վերաբերող որոշումներ ընդունվել են միայն կառավարության կողմից, և հենց այդ որոշումները հիմք են հանդիսացել, որ անշարժ գույքը փոխանցվի Հայ առաքելական եկեղեցուն:
Թովմասյանը չպարզաբանեց, թե կոնկրետ Հովհաննավանքի գույքը փոխանցվել է սեփականության իրավունքի, թե օգտագործման իրավունքով: Նա ընդգծեց, որ եկեղեցու տնօրինության տակ ներկայումս կա մոտ 600–700 միավոր անշարժ գույք:
Անդրադառնալով գույքահարկի հարցին՝ Կադաստրի կոմիտեի նախագահը նշեց, որ կան եկեղեցական օբյեկտներ, որոնք ազատված են գույքահարկից և հողի հարկից, սակայն որոշ գույքեր հարկեր վճարում են օրենքի կարգով:
Թովմասյանը խոստացավ, որ Հովհաննավանքի սեփականության իրավունքի վերաբերյալ մանրամասներ կտրամադրվեն գրավոր դիմում ստանալուց հետո:
