Ադրբեջանի պաշտպանության նախարարության տարածած տեղեկության համաձայն՝ ադրբեջանական բանակի անձնակազմի մի խումբ մասնակցում է Թուրքիայում անցկացվող «Նուսրաթ 2025» միջազգային զորավարժություններին։
Ըստ տեղեկությունների՝ Սարոսի ծոցում անցկացվող զորավարժություններին մասնակցում են ՆԱՏՕ-ի երկրների ռազմածովային և ռազմաօդային ուժերը, Ափամերձ պահպանության հրամանատարության համապատասխան ստորաբաժանումները և տարբեր երկրների դիտորդներ։
Զորավարժությունների նպատակն է` բարելավել ստորաբաժանումների և հրամանատարությունների գիտելիքներն ու հմտությունները ականապատման մարտերի պլանավորման, իրականացման և գնահատման գործում, ինչպես նաև զարգացնել համագործակցությունը և համատեղ կարողությունները Թուրքիայի ռազմածովային ուժերի և բարեկամ և դաշնակից երկրների ռազմածովային ուժերի միջև։
Նշենք, որ Ադրբեջանից բացի, զորավարժություններին մասնակցում են ընդհանուր առմամբ 44 զինծառայող ԱՄՆ-ից, Արաբական Միացյալ Էմիրություններից, Բահրեյնից, Բուլղարիայից, Ինդոնեզիայից, Հարավային Աֆրիկայից, Նիդեռլանդներից, Քենիայից, Կորեայի Հանրապետությունից, Քուվեյթից, Մալայզիայից, Մարոկկոյից, Եգիպտոսից, Պակիստանից, Պերուից, Սաուդյան Արաբիայից, Սինգապուրից, Շրի Լանկայից և Օմանից։
