Քաղաքական մեկնաբան Հակոբ Բադալյանի թելեգրամյան գրառումը. ««Մեզ պետք են Տոմոհավկներ: Մենք դրանցից շատ ունենք, բայց մենք չենք կարող մաշել մեր պահուստները», հայտարարել է ԱՄՆ նախագահ Դոնալդ Թրամփը՝ Պուտինի հետ հեռախոսազրույցից հետո:
Նա ասել է նաև, որ Բուդապեշտում Պուտինի հետ հանդիպումը կկայանա երկու շաբաթից և վստահություն է հայտնել, որ կլինի լավ հանդիպում:
Թրամփը կասկած է հայտնել Տոմոհավկների տրամադրման նպատակահարմարության մասին, ինչպես նաև ոչ պատեհ է համարել Ռուսաստանի հանդեպ նոր պատժամիջոցները:
Ուկրաինայի նախագահ Զելենսկին այսօր մեկնել է Վաշինգտոն և համենայն դեպս այդ այցին նախորդող ինֆորմացիոն հոսքերում Տոմոհավկների հարցը դիտարկվում էր գլխավորներից մեկը, իսկ գուցե՝ առանցքայինը:
Ըստ ամենայնի, Զելենսկին այդ իմաստով կմնա ձեռնունայն: Սակայն գլխավոր մարտահրավերը իհարկե այն է, թե արդյո՞ք նա կհայտնվի որևէ նոր ճնշման ներքո: Եթե Պուտինն ու Թրամփը այդ հանդիպման նախօրեին խոսում են 2,5 ժամ և անգամ գրեթե հստակ պայմանավորվում մոտակա օրերին նոր հանդիպում կազմակերպելու մասին, ապա դա նշանակում է, որ խոսել են շատ կոնկրետ բաներ: Իսկ դա նշանակում է, որ կամ Զելենսկին պետք է տեղավորվի այդ խոսակցության համատեքստում, կամ կհայտնվի հնարավոր նոր ճնշման ներքո:
Մյուս կողմից, Զելենսկին իհարկե կշարունակի ապավինել եվրոպական դերակատարների աջակցությանը, քանի որ եվրոպացիները ևս ունեն խնդիր՝ թույլ չտալ Թրամփ-Պուտին ֆունդամենտալ գործարք, որի թիրախում կլինի եվրոպական անվտանգության համակարգի նոր ճարտարապետությունը կամ այլ կերպ ասած՝ Եվրոպայի նոր բաժանումը:
Ի դեպ, այդ իմաստով նաև հատկանշական է, որ նրանք հանդիպման վայր են ընտրել Բուդապեշտը»:
