ԱԺ «Հայաստան» խմբակցության պատգամավոր Զեմֆիրա Միրզոևան ֆեյսբուքյան էջում գրառում է կատարել՝ ահազանգելով, որ ոստիկանները Վերին Դվին համայնքում անօրինական ձերբակալություններ են իրականացնում։
«Բնակիչների խոսքով՝ իրավապահները թույլ չեն տալիս մարդկանց իրենց առօրյա գյուղատնտեսական աշխատանքները կատարել և բացահայտ հայտարարում են՝ «Տեռոր ենք անում, ահաբեկում ենք, լավ ենք անում, շուտով հատուկ ջոկատաիններ էլ կկանչենք»։
Ըստ ահազանգի՝ ձերբակալում են թե՛ տղամարդկանց, և թե՛ կանանց»,- նշել է պատգամավորը։
Yerevan.Today-ին Արարատի մարզի Վերին Դվինի համայնքի բնակիչներից մեկը պատմեց, որ օրերս վեճ է եղել Արևշատ և Վերին Դվին գյուղերի մի քանի բնակչի, այդ թվում՝ Արևշատի գյուղապետի միջև․ վեճը եղել է մթերած ծիրանի գումարը ժամանակին չտրամադրելու վերաբերյալ։ Ըստ երևույթին, վեճը վերածվել է ծեծկռտուքի։ Դրանից հետո ոստիկանությունը ներխուժում է Վերին Դվին ու սկսում բերման ենթարկել մարդկանց՝ անկախ տարիքից, սեռից և նրանից՝ վեճի հետ առնչություն ունի, թե չէ։
Նշենք, որ, ըստ մեզ ահազանգած բնակչի, ոստիկանները Արևշատ համայնք չեն մտել, այլ միայն Վերին Դվին։
Հավելում․ Ավելի ուշ ՆԳՆ-ից լրատվամիջոցներին պարզաբանել են, որ խուլիգանության փաստով նախաձեռնված քրեական վարույթի շրջանակում ձերբակալվել է Արևշատ համայնքի 4 բնակիչ, այնուհետև ոստիկանությունը գործողություններ է սկսել Վերին Դվինում
