ԱՄՆ դեսպանատունը մարտի 23-ին հայտարարություն է տարածել, ըստ որի՝ «քրեական հանցանքի համար դատվածությունը կարող է ԱՄՆ մուտք գործելու հնարավորությունից ձեզ մեկընդմիշտ զրկել: Նույնիսկ ոչ ծանր հանցանքը կարող է վիզայի մերժման պատճառ դառնալ»։
Հայտարարության մեջ կա նաև չափազանց ուշագրավ մի դրվագ. «Հյուպատոսական պաշտոնյաներին հասանելի են քրեական հաշվառումների տվյալները և նրանք դիտարկում են նախկին խախտումների ու ձերբակալությունների մասին տվյալները»,- ասվում է հայտարարության մեջ ու ավելացվում, որ «դիմումի մեջ և հարցազրույցի ընթացքում հայտնեք բացառապես ճշմարտությունը. սուտ ասելու պարագայում ձեր հանդեպ կսահմանվի մուտքի արգելք»։
Փաստենք, որ այս ամենը թե՛ մարդու իրավունքների, անձնական տվյալների պաշտպանության կոպիտ խախտում է, թե՛, միաժամանակ, անմեղության կանխավարկածի խախտում։ Ի՞նչ է նշանակում հայտարարությունից բխող այն կանոնը, որ, եթե անգամ գործ է հարուցված, արդեն իսկ «մեղավոր ես» ու վիզա չես ստանալու։ Հետաքրքիր է՝ ո՞ր մի խելացի գլուխն է ՀՀ քաղաքացիների քրեական հաշվառումների տվյալները փոխանցել ԱՄՆ-ին և դրել այդ երկրի դեսպանատան տրամադրության տակ: ՀՀ հատուկ ծառայություններին, օրինակ, հասանելի՞ են ԱՄՆ քաղաքացիների՝ քրեական հաշվառումների մասին տվյալները:
Yerkir.am-ն այս մասին գրավոր հարցում է արել ՀՀ կառավարությանը, և պատասխանը կներկայացնենք շուտով:
