Խոսնակն ասում է, որ վարչապետին «Իսկանդերի» վերաբերյալ ճիշտ չի զեկուցվել

«Հայաստանի վարչապետն առկա փաստերի և տվյալների համադրության արդյունքում եկել է եզրակացության, որ իրեն այս իրավիճակի առնչությամբ ճիշտ չի զեկուցվել: Ավելին, վարչապետի հայտարարությունը ոչ մի կապ չունի ռազմական և ռազմարդյունաբերական համագործակցության ոլորտում հայ-ռուսական դաշնակցային հարաբերությունների բովանդակության ու որակի հետ: Կասկած չի հարուցում և այն հանգամանքը, որ ռուսական զենքը լավագույններից է աշխարհում: Հայաստանի Հանրապետությունը շարունակում է սերտ համագործակցությունը Ռուսաստանի Դաշնության հետ՝ ռազմական արդյունաբերության և բարձր տեխնոլոգիաների ոլորտներում և մտադիր է քայլեր ձեռնարկել այն էլ ավելի խորացնելու ուղղությամբ», - նշել է Գևորգյանը:

Հիշեցնենք՝ ՀՀ երրորդ նախագահ Սերժ Սարգսյանը հայտարարել էր, որ «Իսկանդերը» կիրառվել է, կիրառվել է պատերազմի վերջին շրջանում, իսկ ավելի կոնկրետ` Շուշիի ուղղությամբ։

«Իսկ «Իսկանդերը» պետք էր կիրառել արդեն պատերազմի չորրորդ-հինգրերոդ օրը», - ասել էր Սարգսյանը։

Վարչապետ Նիկոլ Փաշինյանը անդրադարձել էր Սերժ Սարգսյանի այս հայտարարությանը՝ հարց ուղղելով երրորդ նախագահին։

«Իսկ, գուցե, պատասխանեն՝ իսկ ինչո՞ւ կրակած «Իսկանդերը» չի պայթել կամ պայթել է տասը տոկոսով, օրինակ», - հայտարարել էր Փաշինյանը։

Ռուսաստանի Դաշնության պաշտպանության նախարարությունն այս թեմայի վերաբերյալ հայտարարությամբ էր հանդես եկել՝ ընդգծելով, որ «Իսկանդեր-Մ» հրթիռային համալիրներ Լեռնային Ղարաբաղում հակամարտության ընթացքում չեն օգտագործվել։

«Հայաստանի վարչապետին, հավանաբար, մոլորության մեջ են գցել», - նշել էին ՌԴ ՊՆ-ից։