Մենք մանկատան երեխային մատնում ենք անտերության, երբ դայակին 50, 60 հազար դրամ ենք տալիս․ Փաշինյան

ՀՀ վարչապետ Նիկոլ Փաշինյանը, մանկատների աշխատողների աշխատավարձի բարձրացման հարցի քննարկման ժամանակ, նշեց՝ կարևոր է արձանագրել, որ  աշխատավարձերի այսպիսի բարձրացմամբ ոչ միայն այդտեղ աշխատող անձանց սոցիալական խնդիր են լուծում, այլև այդ հաստատություններում գտնվող երեխաներին մատուցվող ծառայությունների որակի բարձրացման հարցը, քանի որ դրանով պահանջներն ավելին են լինելու:

Մեզ հաճախ մեղադրում են միջոցներ խնայելու մեջ, կապված մանկատները փակելու հետ, բայց այդ միջոցները ամբողջությամբ ուղղվում են հենց նույն ոլորտին: Վարչապետ Նիկոլ Փաշինյանը և այդ մեղադրանքը տարօրինակ համարեց: «Այսինքն չե՞ն մեղադրում, որ այդ միջոցները անարդյունավետ ծախսվում են, այդ հաստատություններում ստեղծվել են աղետալիին մոտ իրավիճակ, սկսած հոգաբանականից և սպասարկման որակից, իսկ երբ մենք միջոցները փորձում ենք արդյունավետ օգտագործել, մեզ մեղադրում են միջոցներ խնայելու մե՞ջ: Դա լավ մեղադրանք է, ես ուրախ եմ այդ մեղադրանքի համար, որովհետև մենք խնդիր ենք դրել, որ պետական միջոցները մաքսիմալ արդյունավետ ծախսվեն»,-ասաց նա:

Վարչապետը նշեց, որ չեն կարող ասել մանկատան դայակին տրվող 90 հազար դրամը բարձր աշխատավարձ է, և այստեղ խոսքը միայն նրա մասին չէ, թե դայակն ուզում է պատշաճ որակի ծառայություն մատուցել, թե ոչ, հարցն այն է, թե ինքն այդքան գիտելիք, հմտություն ունի՞, թե ոչ: «Այնպես չէ, որ մենք մարդկանցից ուզում ենք փողով վերաբերմունք գնել, ընդհակառակը, աշխատավարձի բարձրացմամբ մենք ուզում ենք բարձր որակավորում ունեցող մասնագետների համար այդ աշխատատեղը գրավիչ դարձնել: Մենք այդ երեխային մատնում ենք անտերության, երբ դայակին 50, 60 հազար դրամ աշխատավարձ ենք տալիս»,-ասաց նա:

Փաշինյանը նկատեց, որ դա բարձր որակավորում պահանջող, բարձր գիտելիքներ պահանջող աշխատանք է: «Մենք այդ ուղղությամբ պետք է գնանք նաև պետական կառավարման համակարգում, դժվար ենք գնում, իհարկե, բայց գնում ենք»,-ասաց նա: