Գնդեվազի վնասված ջրագիծը վերականգնվել է. Լուսանկարներ

«Մայիսի 18-ի երեկոյան Ամուլսարի շինարարական աշխատանքների ժամանակ վնասվել է Գնդեվազ համայնքը սնուցող ջրագծերից մեկը՝ շինարարական 7-րդ հարթակի ստորին հատվածում, որի հետևանքով համայնքին մատակարարվող ջրին հող է խառնվել։ Վնասված ջրագծով ջրամատակարարումը դադարեցվել էր»,- հայտնում է «Լիդիան Արմենիա»-ն՝ հայցելով համայնքի բնակիչների ներողամտությունը։ Միաժամանակ, ընկերությունը հավելում է, որ այժմ, արդեն, ջրագիծը վերանորոգված է, վթարի հետևանքները՝ վերացված: Ջրամատակարարումը վերականգվել է:

Ընկերությունը ներկայումս իրականացնում է ոռոգման ջրամբարի մաքրման աշխատանքներ, որը նախատեվում է ավարտել մայիսի 20-ին:

«Լիդիան Արմենիա»-ն հայտնում է, որ ջրամատակարարման դադարեցման ընթացքում Գնդեվազ համայնքի բնակիչներին ապահովել է խմելու ջրով։

«Լիդիան Արմենիան» ճանապարհների և որոշ ենթակառույցների շինարարական աշխատանքերի իրականցման համար ներգրավել է հայաստանյան մոտ մեկ տասնյակ մասնագիտացված կապալառուներ։ «Արդեն մոտ երկու տարի տևող լայնածավալ շինարարական աշխատանքների ընթացքում ջրագիծը վնասվում է երրորդ անգամ։ Շինարարական աշխատանքների ժամանակ կապալառու ընկերության կողմից նման դեպքերը դժվար է ամբողջությամբ բացառել, այդուհանդերձ, «Լիդիան Արմենիայի» համար անընդունելի է այդպիսի թերացումը։ Ընկերությունը պատրաստվում է դիմել համապատասխան լիազորված մարմիններին՝ տեղի ունեցածի լիարժեք քննություն իրականացնելու համար։  «Լիդիան Արմենիան» կապալառու ընկերությունների է ներգրավել միայն շինարարական աշխատանքներում, իսկ հանքարդյունաբերական գործունեությունը «Լիդիան Արմենիան» իրականացնելու է բացառապես սեփական մասնագետների միջոցով»,- նշված է հաղորդագրության մեջ: