Վարչապետի հետֆրանկոֆոնյան ուղիղ միացումը

Վարչապետ Փաշինյանը, ֆեյսբուքյան ուղիղ եթերում ամփոփելով Ֆրանկոֆոնիայի միջազգային կազմակերպության 17–րդ գագաթնաժողովը, նշել է՝ գագաթնաժողովի արդյունքները մեր երկրի համար դրական են։

Վարչապետը նկատել է, որ դա անկախությունից ի վեր ամենախոշոր միջազգային իրադարձությունն էր մեր երկրում, որը ծառայել է մեր երկրի միջազգային հեղինակության բարձրացմանը։

Փաշինյանը արձանագրել է, որ Գագաթնաժողովն անցել է շատ բարձր մակարդակով և շնորհակալություն է հայտնել բոլոր մարդկանց, ովքեր ներգրավված են եղել կազմակերպչական աշխատանքներում՝ փոխվարչապետ Տիգրան Ավինյանին, ԱԳ նախարար Զոհրաբ Մնացականյանին  և այլ կազմակերպիչների։

Նա նկատել է, որ Գագաթնաժողովը Հայաստանում կազմակերպելու մասին որոշումը կայացրել են դեռ 2016 թ–ին. «Գագաթնաժողովը Հայաստանում անցկացնելու գործում շատ մեծ է ՀՀ արտաքին գործերի նախկին նախարար Էդուարդ Նալբանդյանի դերակատարությունը։  Հատուկ շնորհակալություն Էդուարդ Նալբանդյանին այդ ջանքերի համար»,- ասել է վարչապետը։

Նա ընդգծել է նաև Ոստիկանության և ԱԱԾ–ի արդյունավետ ծառայությունը։

Վարչապետը չի մոռացել նաև շնորհակալություն հայտնել ֆրանսերենի իր դասախոսին և խոստացել շարունակել ֆրանսերենի, անգլերենի և ռուսերենի ուսումնառությունը։ 

«Հենց հիմա սկսվում է Կանադայի վարչապետ Ջասթին Թրյուդոյի պաշտոնական այցը Հայաստան, որը տեղի է ունենալու այսօր և վաղը։ Կանադայի վարչապետի հետ հասցրել ենք շփվել և այս պաշտոնական այցը շատ կարևոր ավարտական ակորդ կլինի»,-նշել է Փաշինյանը։ 

Նա շնորհակալություն է հայտնել նաև ժողովրդին. «Մեր երկրում ամենատպավորիչը մարդիկ են, նրանց հյուրասիրությունը, ջերմությունը շատ կարևոր է»։