19 երիտասարդ բանակից ազատվեց, 134-ն էլ տարկետում ստացավ

Կառավարությունն այսօրվա՝ հուլիսի 27-ի նիստում մի շարք երիտասարդների որոշեց տարկետում տալ, որոշներին էլ ազատել բանակից։

Մասնավորապես,

Ֆյոդոր Միխայիլի Չիտիպախովյանին ազատեց շարքային կազմի պարտադիր զինվորական ծառայությունից։ Նա ընդգրկված է Հայաստանի Հանրապետության գեղասահքի ազգային հավաքականի կազմում:

Բանակից ազատվեցին նաև Ուգոչուկվու Քրիստուս Վենանտուսի Իվուն, Նայաիր Հովհաննեսի Թիկնիզյանը  և Էդուարդ Արթուրի Բագրինցևը, ովքեր հանդես են գալիս ֆուտբոլի Հայաստանի Հանրապետության ազգային հավաքական թիմի կազմում, իսկ Արսենի Մարտունի Պետրոսյանը հրավիրվել է ֆուտզալի ազգային հավաքականում հանդես գալու նպատակով:

Բանակից ազատվեց ևս 14 երիտասարդ՝ գիտական գործունեության ընթացքում ձեռք բերված գիտելիքների ընդլայնմամբ և նոր գիտե­լիք­ների ստացմամբ ու կիրառմամբ պայմանավորված։

134 երիտասարդ տարբեր տարիների զորակոչից ստացավ տարկետում՝ պայմանավորված նրանով, որ

• Սովորում են Հայաստանի Հանրապետության և օտարերկրյա պետությունների հանրակրթական ծրագրերով և չեն ավարտել պարտադիր հանրակրթական ծրագիրը։
• Սովորում են պետության համար առաջնահերթ և կարևորություն ներկայացնող մասնագիտություններով։

Միաժամանակ, կառավարությունը դադարեցրեց բռնցքամարտիկ Էրիկ Արամի Իսրայելյանի տարկետումը, որը վերջերս քննադատել էր կառավարությանը՝ չեմպիոնի տիտղոս նվաճելուց հետո իր նկատմամբ անուշադրության համար։ Փաստորեն, կառավարությունը ուշադրություն դարձրեց և կտանի բանակ։