Ռուսաստանում հայ գործարարին առևանգածները խոստովանել են մեղքը

«Օրլովսկայա Նիվա» ագրոհոլդինգի հայ սեփականատեր Սերգեյ Բուդաղովի առևանգման 4 կասկածյալները կալանավորվել են: Հարցաքննությունների ժամանակ նրանք խոստովանել են, որ գործարարին առևանգել են փրկագին պահանջելու համար: Այս մասին հայտնում է «ՌԻԱ Նովոստի»-ն՝ հղում տալով Քննչական կոմիտեին:

Քննչական կոմիտեի տվյալներով՝ հուլիսի 10-ին «Օրլովսկայա Նիվա» ագրոհոլդինգի սեփականատեր Բուդաղովն առևանգվել է զինված անձանց կողմից: Անհայտ անձինք կանգնեցրել են «Lexus LX 570» ավտոմեքենան, որով ընթանում էր Բուդաղովը, նստել են մեքենան և գործարարի ու վարորդի հետ ուղևորվել գերեզմանատուն: Այնտեղ վարորդին կապել են և թողել ավտոսրահում, իսկ Բուդաղովին ուժով նստեցրել են իրենց ավտոմեքենան և տարել անհայտ ուղղությամբ: Գործարարին ազատ արձակելու համար նրանք 20 միլիոն ռուբլի են պահանջել: Առևանգման փաստի առթիվ քրեական գործ է հարուցվել:

Հիշեցնենք, որ հուլիսի 13-ի գիշերը՝ հատուկ գործողության ընթացքում,  ուժայիններն ազատել են Բուդաղովին:

«Դատարանը բավարարել է քննչական մարմինների միջնորդությունը և նախկինում դատապարտված 4 անձանց նկատմամբ խափանման միջոց է կիրառել կալանավորումը Սերգեյ Բուդաղովին առևանգելու համար»,- նշվում է հաղորդագրության մեջ:

Նշվում է, որ ներկայացված ապացույցների ճնշման տակ նրանք խոստովանել են, որ հանցագործություն են կատարել՝ փրկագին պահանջելու համար: