12  07  2018

Նախարար Մակունցը սայթաքել է...բավական անհաջող. «Հայոց աշխարհ»

Նախարար Մակունցը սայթաքել է...բավական անհաջող. «Հայոց աշխարհ»

«Հայոց աշխարհ» թերթը գրում է. «Այն, որ երկրի գլխին եկած թավշահեղափոխական կառավարության անդամները չեն տառապում ավելորդ համեստությունից, կարծես առանց հավելյալ մեկնաբանությունների էլ պարզ է: Բայց ա՞յս աստիճան:

Հերթական սյուրպրիզը մատուցեց մշակույթի նախարար Լիլիթ Մակունցը: Յուր ֆեյսբուքյան գրառմամբ նա հանրությանը մասնավորապես ավետեց հետևյալը. «Տեղեկացնում եմ, որ Հայաստանի պատմության թանգարանում 5-օրյա ժամկետում կհատկացվի ցուցասրահ՝ նվիրված թավշյա հեղափոխությանը: Երկուշաբթի օրը աշխատանքային խումբը կապ կհաստատի թանգարանի տնօրեն պարոն Գրիգորյանի հետ և հնարավորինս սեղմ ժամկետներում կսկսի ցուցասրահը համապատասխան նմուշներով համալրելն ու կահավորելը: Ցուցասրահի պաշտոնական բացման մասին կտրամադրենք լրացուցիչ տեղեկատվություն»:

Նախարար Մակունցը, ինչ խոսք, սայթաքել է: Ու բավականաչափ անհաջող:

Չէ՞ որ այդ հեղափոխությունը դեռ մի կարգին պատմություն էլ չի դարձել: Շատերն անգամ ասում են, որ այն չի էլ ավարտվել (դե՝ հեղափոխություններն սկիզբ ունենում են, ավարտ՝ ոչ, սա հանրահայտ է):

Իսկ առհասարակ եղե՞լ է հեղափոխություն, թավշյա թե անթավիշ: Դեռ իշխանափոխություն է եղել ընդամենը: Նախկին պաշտոնյաներին փոխարինել են նոր, փողոցում հավաքված հայրենակիցների բացականչություններով «ընտրված» վարչապետը և նրա ընտրած ընկեր-ծանոթ-մերոնքական, մի քիչ էլ՝ «ժողովրդին միացած» ծառուկյանական ու դաշնակցական նախարարներ։

Չէ, բայց միտք է: Ցուցասրահում կլինեն Նիկոլ Փաշինյանի ցուպը, կպչուն ժապավենով շարքից հանված արագաչափը, վրանը, անձրևանոցը, գլխարկը, բոթասը, ձեռքի վիրակապը: Հա, անպայման «Մերսեդեսի» ձայնային ազդանշանի հարմարանք, վուվուզել, շերեփ և կաթսա, փողոց փակելու ժամանակ գործածված աղբաման, Չալոյի մոմե արձանիկը, բարձրախոս, «Ազատություն» ռադիոկայանի թղթակցի խոսափողը, կհնչի Հայկոյի ձայնը՝ «իշքա՜մ, շքա՜մ...»: Նիկոլ Փաշինյանի ձայնը՝ «Հայաստանի հպա՜րտ քաղաքացիներ...»: Մի խոսքով, ահագին ցուցադրելու թավշյա հանգամանքներ կան:

Իսկ եթե լուրջ, ապա շարունակ այնպիսի տպավորություն է, որ նոր նախարարները հատուկ ուզում են անել ամեն ինչ, որ անդադար կրկեսային ներկայացման հետևելու տպավորություն թողնեն»:

Նյութն ամբողջությամբ կարդացեք «Հայոց աշխարհ»-ում:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ