Վատ վիճակում գտնվող Նավուր-Բերդ ավտոճանապարհը այս տարի էլ չեն նորոգելու, գրել է տավուշցի լրագրող Ոսկան Սարգսյանը։
«Թթուջուր-Նավուր ավտոճանապարհը կառուցապատելուց հետո Բերդ համայնքի բնակիչների մեծ մասը գերադասում է Երևան, Հայաստանի այլ վայրեր հասնել այդ ճանապարհով (այն ավելի կարճ է ու քիչ ժամանակատար է), սակայն այդ ճանապարհի սկզբնամասը՝ մոտ 10 կիլոմետր երկարությամբ Նավուր-Բերդ ավտոճանապարհը, փոսառատ, անհարթ է, այն հրատապ կարիք ունի հիմնանանորոգման։
Տարածքային կառավարման և ենթակառուցվածքների նախարար Դավիթ Խուդաթյանին հարցում եմ արել․ «Ե՞րբ է հիմնանորոգվելու հանրապետական նշանակության ավտոճանապարհի Նավուր-Բերդ հատվածը»։ Նախարարությունից պատասխանել են․ «Հայտարարվել է Հ-36, /Մ4/( Իջևան)-Նավուր-Բերդ-Այգեպար հանրապետական նշանակության ավտոճանապարհի կմ42+100(40+606)+կմ51+900 հատվածի հիմնանորոգման և Հ-36, /Մ4/( Իջևան)-Նավուր-Բերդ-Այգեպար հանրապետական նշանակության ավտոճանապարհի կմ 51+900-կմ56+400 հատվածի հիմնանորոգման աշխատանքների նախագծերի պատրաստման և ծախսերի գնահատման ծառայությունների ձեռբերման գնման ընթացակարգ։ Հայտերը կբացվեն սույն թվականի սեպտեմբերի 9-ին։ Նախագծային աշխատանքները կիրականացվեն այս տարի, իսկ կապալային աշխատանքները՝ 2026 թվականին»,- հայտնել է Սարգսյանը։
