23 12 2022

Նիկոլ Փաշինյանն ու նրա անձնական «նախագահ» Վահագն Խաչատուրյանն այլևս բացեիբաց են ծաղրում հանրությանը

Նիկոլ Փաշինյանն ու նրա անձնական «նախագահ» Վահագն Խաչատուրյանն այլևս բացեիբաց են ծաղրում հանրությանը

Հարկատուների հաշվին անասելի բարձր ու նույնքան անիմաստ վարձատրվող Վահագն Խաչատուրյանը, որ պատկերավոր ասած՝ Նիկոլ Փաշինյանի տաբատի ետևի գրպանում «նախագահ» է աշխատում, որոշել է իր գործատուից հետ չմնալ՝ հանրությանը ձեռ առնելու հարցում: Այս Վահագն Խաչատուրյանն ու իր ստնտու Նիկոլ Փաշինյանը որոշել են այլևս բացեիբաց ծաղրել հանրությանը: Սրանք, որ շաբաթվա մեջ, երևի մի քանի անգամ ասում-խոսում են, մի հատ էլ որոշել էին, այսպես ասած՝ «կամեռաների առաջ», փողկապով-բանով, պաշտոնական հանդիպում ունենալ: Դա դժվար է բնորոշել այլ կերպ, քան՝ ձեռառնոցի, ծաղր:

Եթե նշված երկուսի համատեղ ջանքերի հետևանքով նաև Հայաստանը մղձավանջի ու կործանման ընթացքի մեջ չլիներ, Նիկոլ Փաշինյանի ու նրա «նախագահ» Խաչատուրյանի հանդիպումը կարելի էր անեկդոտային համարել:

Չնայած, նրանց հանդիպման ընթացքի վերաբերյալ տարածված պաշտոնական հաղորդագրությունն ինքնին անեկդոտ է: Ավելին, ամենասուր գրիչն ունեցող որևէ երգիծաբան հազիվ թե ավելի թունավոր պամֆլետ կարողանար հորինել նշված երկուսի «պաշտոնական հանդիպման» թեմայով, քան տարածված «պաշտոնական հաղորդագրությունն» է:

Լավ, ի՛նչ են ասել-խոսել Փաշինյան Նիկոլն ու Խաչատուրյան Վահագնը: Վերջինս, ուրեմն, երկար-բարակ մի գովերգել է գովաբանել Նիկոլին, որ էլ ասելու չէ: Թեպետ, պե՛տք է ասել: Վահագն Խաչատուրյանը դայլայլել է. «...ասեմ, որ շատ քիչ երկրներ կան, որ այսպիսի հաջողություններ են արձանագրել, շատ քիչ երկրներ կան, որ համաշխարհային տնտեսական ծանր պայմաններում կարողացել են իրենց հնարավորությունները մաքսիմալ օգտագործել: Ես Ձեզ կարող եմ ասել, գնահատական տալ, որ սա պայմանավորված է ոչ թե մեկ տարվա աշխատանքով, այլև վերջին չորս տարիներին կատարած բարեփոխումներով: Սա ուզում եմ, որ նաև Դուք ուղղակի որպես մասնագետի գնահատական ընդունեք, որովհետև ինձ հետաքրքրում էր, թե ինչպե՞ս է ստացվում, որ մեզ մոտ այսպիսի հաջողություններ ենք ունենում»:

Վահագն Խաչատուրյանի դրսևորած նախնադարյան քծնանքն ու շողոքորթությունն են ոչ միայն կտրուկ բացասական ռեակցիա հարուցում, այլև ծայրահեղ ցինիզմը: Վերջին չորս տարբա բարեփոխումնե՞ր: Այսինքն, Արցախըվարի տալը, ահռելի՝ հարյուր միլիարդավոր դոլարների կորուստների ու վնասների առաջ ազգն ու պետությունը կանգնեցնելը, հանրության անվտանգությունը, այդ թվում՝ պարենային, էներգետիկ, տնտեսական անվտանգության էական մասն ապահովող տարածքները թշնամուն, թուրքի՛ն նվիրե՞լն է «բարեփոխում»: Մի ամբողջ սերնդի, այն էլ՝ միտումնավոր սխալներով կոտորածի մատնե՞լն է նվաճում, 18-20 տարեկան հազարավոր ու հազարավոր հյորդիների մահվան մատնե՞լը: 

Դե ինչ, սրտանց կարելի է մաղթել, որ Վահագն Խաչատուրյանն այդպիսի «խոշոր նվաճում» ունենա անձնապես և շարունակի արտասանել, թե «ինչպե՞ս է ստացվում, որ մեզ մոտ այսպիսի հաջողություններ ենք ունենում»:

Դուք 1 օր առանց «ախռանայի» դուրս եկեք և հաջողություններ հաստատ կունենաք: Դուք ամենամեծ հաջողությունը, չկասկածեք, ուժգին ու անդառնալիորեն կունենաք ու կստանաք ձեր պաշտոններից հեռացվելուց անմիջապես հետո:

Տնտեսագե՜տ, մասնագիտորեն հետաքրքրվո՜ղ...:

Հայաստանի արտաքին պարտքը առասպելական չափերի հասցնելն, ուրեմն «մեծ հաջողություն» է սրանց համար: Բնակչության աղքատացումն ու գների արբանյակային աճը սրանց համար «հաջողություն» է: Երկրի ռազմավարական մայրուղիները, այդ թվում՝ տնտեսական առումով ռազմավարական ենթակառույցները թշնամական ուղղակի հարվածների տակ դնելը սրանց համար խոշոր նվաճում է:

Այդքանից հետո արժե՞ նկատել, որ նույն Վահագն Խաչատուրյանի ընկալմամբ, օրինակ, անվտանգային կենսական խնդիրներն ու Արցախի շրջափակումը (մեջբերենք). «...Հասկանում եմ, որ շատ դժվար ժամանակներ են կառավարության համար: Վերջին իրադարձություններն առավել ևս, բայց համոզված եմ, որ սրանով մեր ուղղուց պետք է չշեղեն, և հիմնականում այս արհեստական դժվարությունները հենց միտված են դրան, որպեսզի շեղվենք և զբաղվենք ավելի կարևոր գործերով...»:

Բացի այն, որ Նիկոլի տեքստ գրողն ուղղագրության հետ խնդիրներ ունի, ի՞նչ է ասում Վահագն Խաչատուրյանը: Նա ասում է, որ «վերջին իրադարձությունները... հիմնականում արհեստական դժվարություններ» են: Արհեստական, էլի: Այսինքն, իրենք թշնամուն գործնականում «էստի համեցեք»-ով ներս մտցնեն մեր անվտանգային ու կենսագոյության տարածք, ու դա բնորոշեն որպես... «արհեստական դժվարությո՞ւն»:

Հա, ու շատ զավեշտալի է հնչում: Ասում է, այդ արհեստական դժվարություններով ուզում են իրենց շեղեն, որ... «զբաղվեն ավելի կարևոր գործերով»:

Տեսնե՞ս որոնք են այդ ավելի կարևոր գործերը: Գուցե Անգլիայի թագուհու դագաղի մոտ ցուցադրաբար նկարվե՞լը, թե՞ Քաթարում ֆուտբոլ նայելը:

 

Արմեն Հակոբյան

 

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ