Գրեք, որ «բաղրամյանցիները» Ձեզ խանգարում են. ոստիկաններն այցելում են տներ. Yerkir.am

Yerkir.am-ի տեղեկություններով՝ ոստիկանության Արաբկիրի բաժնի աշխատակիցները վերջին օրերի գիշերային ժամերին այցելում են Բաղրամյան պողոտայի՝ Հայրենիքի փրկության շարժման նստացույցի վայրին հարակից շենքեր և քաղաքացիներին առաջարկում գրավոր բողոք ներկայացնել առ այն, որ նստացույցի մասնակիցներն իրենց ներկայությամբ, ձայներով կամ գործողություններով իբրև թե խանգարում են քաղաքացիների հանգիստը կամ խաթարում բնականոն կյանքը:

Ոստիկանների հետ նման առերեսում ունեցած բնակչուհիներից մեկն այցելել է Բաղրամյան պողոտա և նստացույցի մասնակիցներին հայտնել այդ մասին:

«Ձեր թիկունքում այսպիսի բաներ են կատարվում, զգուշացե՛ք, ոստիկանությունն առայժմ կատարում է այս դավաճան իշխանության հրահանգները, և ոստիկաններից ոմանք ներքաշված են այսպիսի կեղտոտ խաղերի մեջ»,- հուզված տոնով նշել է Բաղրամյան պողոտա այցելած բնակչուհին:

Թե ոստիկաններին որքանո՞վ է հաջողվել համոզել քաղաքացիներին, քանի՞ տուն են այցելել նրանք, քանի՞ քաղաքացի է ամոթանքներ տեղացել և դուռը շրխկացրել նման ողորմելի քայլ կատարող ոստիկանների վրա՝ առայժմ պարզ չէ: