03 08 2017

Միգրացիոն հոսքերի կառավարման թեմայով վարժանք հայ-վրացական սահմանին

Միգրացիոն հոսքերի կառավարման թեմայով վարժանք հայ-վրացական սահմանին

ՄԱԿ-ի միգրացիայի միջազգային կազմակերպությունը և ՀՀ ԱԻ նախարարությունը Գոգավան սահմանային անցակետում անցկացրել են համատեղ ուսումնական վարժանք՝ «Խոշոր աղետների կամ ռազմական գործողությունների հետևանքով առաջացած միգրացիոն հոսքերի կառավարում» թեմայով: Այս մասին հայտնում է ԱԻ նախարարությունը:

Ի թիվս այլ պաշտոնատար անձանց` Գոգավան սահմանային անցակետում վարժանքի ընթացքին հետևել են ԱԻ նախարար Դավիթ Տոնոյանը, Վրաստանի Ներքին գործերի նախարարի տեղակալ, գեներալ-մայոր Մերաբ Մալանիան, նույն նախարարության արտակարգ իրավիճակների կառավարման գործակալության տնօրեն, քաղաքացիական անվտանգության գնդապետ Նիկոլոզ Սիրադձեն:

Սա միջազգային հովանու ներքո իրականացվող առաջին վարժանքն է միգրացիոն թեմաներով, որում որպես դիտորդ ներգրավված է նաև վրացական կողմը և որն իրականացվում է արտակարգ իրավիճակների ոլորտում հայ-վրացական համագործակցության ընդլայնման ծրագրի շրջանակում: Վերջինիս նպատակն է փորձարկել սահմանային անցակետերի ընթացակարգերն ու միգրացիոն ճամբարի ծավալումը, ղեկավար կազմի ունակությունները միգրացիոն հոսքի ՀՀ տարածք ներթափանցելու դեպքում, ինչպես նաև՝ միգրացիոն հոսքի կառավարմանն ուղղված գործողություններն ավելի արդյունավետ իրականացնելու նպատակով բացահայտել ոլորտում առկա օրենսդրական և ինստիտուցիոնալ համակարգերի բացերը:

Վարժանքին ներգրավված են եղել նաև ՀՀ տարածքային կառավարման և զարգացման, առողջապահության, գյուղատնտեսության նախարարությունների, կառավարությանն առընթեր ԱԱԾ և ոստիկանության ներկայացուցիչներ:

Համաձայն վարժանքի պլանի՝ այլ երկրներում տեղի ունեցող պայմանական ճգնաժամի հետևանքով հայկական մի շարք սահմանային անցակետերում նկատվում է ՀՀ պետական սահմանը հատել ցանկացող մարդկանց թվի աճ: Մասնավորապես՝ Բավրայի, Գոգավանի և Բագրատաշենի անցակետից հաղորդվում է դեպի Հայաստան մուտք հայցողների աճող թվաքանակի մասին: Հորինված սահմանամերձ երկրի տարածքներում նկատվում են միգրանտների ճամբարային խմբեր:

Գոգավանի սահմանային անցակետում գրանցվում է միգրանտների քանակի ամենամեծ աճը: Որոշում է կայացվում կազմակերպել ժամանակավոր տարանցման ճամբար: Վարժանքի ղեկավարը խնդիր է դնում մասնակիցներին՝ սահմանված կարգով իրականացնել միգրանտների սահմանային հատման ընթացակարգերը և իրականացնել միգրացիոն հոսքերի կառավարում:

Գոգավանի սահմանային անցակետից 4 կմ հեռավորության վրա ծավալվում է միգրացիոն ճամբար, որտեղ տեղակայվում են ժամանած միգրանտները: Ճամբարի տարածքում ՀՀ ԱԻՆ, ոստիկանության և ԱԱԾ կողմից իրականցվում է շուրջօրյա հերթափոխ: Բացվում է ճամբարի կառավարման տեղամաս, որտեղ ներգրավվում են համապատասխան գերատեսչությունների ներկայացուցիչներ: Ճամբարի տարածքում գործում են նաև բժշկական, ինֆեկցիոն կետեր, ճաշարան, պահեստ, ինչպես նաև՝ դաշտային բաղնիք, միգրանտներին տրամադրվում են կենսաապահովման համար անհրաժեշտ իրեր, նրանք ապահովվում են սննդով և խմելու ջրով:

ՀՀ պետական գերատեսչությունների համապատասխան մասնագետները կարողացան իրականացնել իրենց առջև դրված գործառույթները՝ արտակարգ իրավիճակից բխող գործողությունների իրականացում, միգրանտների հաշվառում, հասարակական կարգի պահպանություն, ճամբարի անվտանգության ապահովում, միգրանտների առաջին անհրաժեշտության, հատուկ կարիքների բավարարում և այլն:

Նախարար Դ. Տոնոյանը՝ Վրաստանից ժամանած բարձրաստիճան պաշտոնյաների հետ միասին հետևել է պայմանական միգրանտների հաշվառման և տեղավորման գործընթացին, ծանոթացավ ճամբարի տեխնիկական հագեցվածությանը և կենսապահովման պայմաններին:

«Նմանատիպ վարժանքներն անհրաժեշտ է անցկացնել իրական իրավիճակին հնարավորինս մոտեցված տարբերակով, որպեսզի կարողանանք վեր հանել առկա թերությունները և շտկել դրանք», - շեշտել է ԱԻ նախարարը:

Նախարար Տոնոյանը Վրաստանի Ներքին գործերի նախարարի տեղակալ, գեներալ-մայոր Մ. Մալանիայի հետ քննարկեցին նմանատիպ հնարավոր իրավիճակներում հայ-վրացական համագործակցության շրջանակը՝ հաստատելով համատեղ աշխատանքի պատրաստակամությունը:

Միջազգային համագործակցության հովանու ներքո իրականացվող վարժանքի տեսական հատվածը շարունակվելու է ևս 2 օր՝ Վրաստանի դիտորդական առաքելության ներգրավմամբ:

 

 

 

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ