07 07 2022

Ունենք այն, ինչ ունենք. քաղաքապետարանի պաշտոնյան՝ տրանսպորտի աղետալի վիճակի մասին  



Շուտով կներդնենք միասնական տոմսային համակարգի պիլոտային ծրագիր՝ մեկ-երկու երթուղում և դրա արդյունքներով կհասկանանք, թե ինչ վճարման միջոցներ են պետք ներառել: Yerevan.Today-ի հետ զրույցում ասաց Երևանի քաղաքապետարանի տրանսպորտի վարչության պետի պաշտոնակատար Հայկ Սարգսյանը.

«Կունենանք նաև կենտրոնական վերահսկողական կենտրոն, որն արդեն օնլայն և օֆլայն ռեժիմով վերահսկողություն կիրականացնի բոլոր տնտեսվարողների և երթուղիների վարորդների նկատմամբ»:

Ինչ վերաբերում է խնդրին, որ՝ շարժակազմի պակասով պայմանավորված ավտոբուսները ստիպված են լինում երթևեկել գերծանրաբեռնված վիճակում, Հայկ Սարգսյանը նշեց. «Վերջերս մի տեսանյութ հայտնվեց, որ դռները բաց էին, 90-ականները հիշեցի, որ քաղաքացիները կախված գնում էին: Իրականում վարորդը խիստ նկատողություն է  ստացել, նման դեպքեր չպետք է լինեն, Աստված չանի մի ուղևորի մի բան լինի, մենք բոլորս ենք պատասխանատվություն կրում»:

Քաղաքապետարանի պաշտոնյան նշում է նաև, որ ամեն դեպքում վարորդները նման վիճակում երթևեկելու իրավունք չունեն, բայց այլ տարբերակ էլ չունեն.

«Դա գալիս է քաղաքացիներից էլ, մարդիկ իրար սեղմվելով նստում են, վարորդն ինչ անի, չքշի՞, այսինքն վեճի մեջ է մտնելու քաղաքացիների հետ: Հիմա հարցնում եք՝ իրավուքն ո՞ւնի, չէ իրավունք չունի վարորդը, բայց ինչ անի, անջատի, իջնի՞, վարորդին չգիտեմ ինչ կանեն»:

Ամեն դեպքում, չնայած քաղաքապետարանի պաշտոնյան պնդում է, որ որոշակի քայլեր անում են, բայց առաջիկայում տարնսպորտի հետ կապված խնդիրները չեն լուծվի.

«Այս պահին չունենք այն շարժակազմը, որ պետք է համալրենք, ունենք այն, ինչ ունենք այս պահին: Շատ բանի ենք ստպասել, ստիպված պետք է սպասենք մինչև նոր շարժակազմը լինի Հայաստանում»:

Ավելին՝ տեսանյութով:

 

 

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ