Երրորդ անգամ եմ գալիս իշխանության․ իմ մեջ բավարար ուժ տեսնում եմ սա անել ևս մեկ անգամ․ Ռոբերտ Քոչարյան

Երրորդ անգամ եմ գալիս իշխանության։ Վատ, ծանր իրավիճակներում ես շատ լավ եմ աշխատում և կրիզիս-մենեջմենթի կուտակված շատ մեծ փորձ ունեմ։ Չեմ տեսնում որևէ մեկին, որ այս վիճակում կարող է աշխատել ու շատ ավելին անել, քան ես կանեմ։ Նման իրավիճակում այս պայքարի մեջ չմտնել ինձ համար հավասար է վախկոտության կամ դասալքության։ Այս մասին Տավուշի մարզի քաղաքացիների և «Հայաստան» դաշինքի շտաբերի ներկայացուցիչների հետ հանդիպման ժամանակ ասաց ՀՀ երկրորդ նախագահ Ռոբերտ Քոչարյանը։

«Մեկ անգամ Ղարաբաղն եմ ճգնաժամից դուրս բերել, հետո՝ 1997-2008 թթ․-ին, Հայաստանը։ Բավարար ուժ ու էներգիա եմ տեսնում իմ մեջ այդ նույն բանն անել երրորդ անգամ։ Սա կարծես վարչապետի մրցույթ լինի։ Մենք նույնպես հայտ ենք ներկայացրել և հայտարարում ենք, որ կարող ենք դա անել։

Մեր քվեաթերթիկը 24-ն է։ Երևի թե սա խորհրդանշական է։ Մենք մտնելու ենք 24 ժամյա աշխատանքային ռեժիմի մեջ։ Եթե մի գործի մեջ մտնում ենք, ուրեմն ամեն ինչ լավ է լինելու»,- աաց Երկրորդ նախագահը։