Ես հպարտանում եմ «Իմ քայլը» խմբակցությունով․ Նիկոլ Փաշինյան

Վարչապետ Նիկոլ Փաշինյանը ֆեյսբուքյան ուղիղ եթերի ժամանակ հարցերից մեկին ի պատասխան՝ նշեց, որ հպարտանում է իմքայլական պատգամավորներով։

«Գուցե նրանց մի մասին տուն ուղարկեք եւ նոր անձինք ներգրավեք ձեր թիմում»,-հարց է տվել քաղաքացին:  Դիտարկմանը, որ ԱԺ միշխող մեծամասնության պատգամավորների մի մեծ մասը անիմաստ խոսող եւ ոչինչ չանող դեմքեր են, որոնցից մարդիկ հասցրել են հիասթափվել, վարչապետը նշեց․ «Ես հպարտանում եմ «Իմ քայլը» խմբակցությունով:Պառլանետ հենց նշանակում է խոսելու տեղ: Սա կարեւոր ինստիտուտ է ժողովրդավարության առումով եւ պառլամենտը հենց այն տեղն է, որտեղ քաղաքական ուժերը պետք է մտքեր փոխանակեն, մտքերի բախում, բանավեճ տեղի ունենա, եւ այս առումով խոսելը, արտահայտվելը ԱԺ-ում իրականացվող հիմնական գործն է: Մենք էլ որ գնում ենք խորհրդարան, մտքեր ենք  փոխանակում»:

Փաշինյանը հորդորեց չթերագնահատել խոսքի արժեքը. «Այլ բան, որ մեզնից յուրաքանչյուրը բոլորս մեր խոսքի կշռի արժեքի վրա պետք է մտածենք: Ինչ վերաբերում է ԱԺ մեծամասնությանը, ապա այսօր ԱԺ-ի եւ մեր խմբակցության լավագույն գնահատականը տրվել է հարեւան Ադրբեջանում, երբ մեր երկրում տեղի ունեցած ԱԺ արտահերթ ընտրություններից հետո Ադրբեջանում որոշում կայացվեց անցկացնել արտահերթ խորհրդարանական ընտրություններ: Դրա պաշտոնական հիմնավորումը հետեւյալն է, որ Ադրբեջանն ունի կարիք ավելի երիտասարդ եւ ժամանակակից պայմանների ավելի համապատասխան խորհրդարան ձեւավորելու: Ինչ պայմաններ էին փոխվել աշխարհում Ադրբեջանի տեսակետից: Աշխարհում ըստ էության վերջին 1,5 տարվա ընթացքում փոխվել էր միայն այն, որ ՀՀ-ում տեղի էին ունեցել ԱԺ արտահերթ ընտրություններ եւ ձեւավորվել էր ավելի երիտասարդ խորհրդարան, որտեղ շատ երիտասարդ պատգամավորներ էին հայտնվել, որոնք միջազգային հարթակներում շատ լուրջ կարողանում են ներկայացնել Հայաստանն ու Հայաստանի ժողովրդավարությունը»:

Վարչապետը նշեց, որ «Իմ քայլը» խմբակցությունը գործում է բավականին արդյունավետ եւ դրա մասին է խոսում վիճակագրությունը:

«ԱԺ մոնիտորինգ ծրագիրն ամփոփել է ԱԺ 3-րդ նստաշրջանի գործունեությունը ըստ որի, ընդունված օրենքների 30 տոկոսը հեղինակել են պատգամավորները, 70 տոկոսը՝ կառավարությունը: Սա վերջին 10 տարվա ամենաբարձր ցուցանիշն է:

Այսինքն պատգամավորների գործունեությունը երբեք ավելի արդյունավետ չի եղել:

Այս խորհրդարանն իր որակով էականորեն գերազանցում է առնվազն նախորդ մի քանի խորհրդարաններին: Իհարկե, խմբակցությունը ձեւավորվել է հայտնի իրադարձությունների համատեքստում, որի ամենակարեւոր խնդիրն է կայանալ որպես ամբողջական գաղափարական հենքի վրա աշխատող թիմ, եւ այս առումով կա լուրջ անելիք: Ես հույս ունեմ, որ դա մենք միասին կանենք լիարժեք: Մինչեւ այս պահը այդ խնդիրը լուծված է բավական արդյունավետ կերպով: Կարող եմ ասել, որ ամենավերջին քաղաքական քննարկումը, որ եղավ, Սահմանադրական հանրաքվեի հարցի քննարկումը, ես այդ ժամանակ հպարտություն ապրեցի «Իմ քայլը» խմբակցության համար, որովհետեւ շատ բարձր մակարդակի քաղաքական քննարկում տեղի ունեցավ: Իհարկե, հետագա քննարկումներում եւս «Իմ քայլը» խմբակցությունը շատ բարձր մակարդակի աշխատանք։ ցուցաբերեց: Ես հպարտանում եմ դրանով»,-ընդգծեց Փաշինյանը: