Խորհրդարանական ընդդիմությունը ցուցադրեց՝ Հայաստանում պառլամենտարիզմը ողջ է. Ռուբեն Մելիքյան

«Իրավական ուղի» հասարակական կազմակերպության համահիմնադիր Ռուբեն Մելիքյանը ֆեյսբուքյան իր էջում գրառում է կատարել՝ անդրադառնալով արտակարգ դրության օրերին քաղաքացիների տեղաշարժը հսկելու նպատակով հեռախոսները վերահսկելու մասին օրինագծի ընդունումն ԱԺ-ի կողմից մերժելուն:

Հիշեցնենք, որ քննադատության արժանացած նախագիծն այսօր խորհրդարանում չստացավ բավարար քանակությամբ ձայներ: Ընդդիմությունը չմասնակցեց քվեարկությանը, կողմ քվեարկեցին միայն «Իմ քայլի»՝ դահլիճում ներկա 65 պատգամավորները:

Ռուբեն Մելիքյանի գրառումն ամբողջությամբ ներկայացնում ենք ստորև.

«COVID-19-ի դեմ պայքարի պատրվակով մեր բոլորի իրավունքների նկատմամբ անհամաչափ միջամտություն նախատեսող խայտառակ օրինագիծը, Լուսավոր Հայաստան և Բարգավաճ Հայաստան խմբակցությունների ջանքերով, տապալվեց։

Խորհրդարանական երկու ընդդիմադիր խմբակցությունները գործնականում ցուցադրեցին, որ պառլամենտարիզմը Հայաստանում ո՛ղջ է, որ մեծամտացած մեծամասնությունը ամենազոր չէ՛, որ քաղաքական իշխանության պոպուլիզմը և անպատասխանատվությունը կարո՛ղ է արգելափակվել՝ փաստարկով ու համարձակությամբ, որ սխալ առաջնահերթություններն ու սխալ ուղերձները մի օր բերում են տապալման։

Ընդդիմադիրներն այսօր մի կարևոր բան ապացուցեցին. իրավունքի գերակայությունը Հայաստանում ապագա ունի։ Շնորհակալ եմ «իրեղեն ապացույցի» համար»։