Իրանն ու Ռուսաստանն անդրադարձել են Սիրիայում ստեղծված իրավիճակին

Հալեպում ստեղծված իրավիճակը Սիրիայի ինքնիշխանության դեմ ոտնձգություն է: Այս մասին, ՌԻԱ Նովոստի-ի փոխանցմամբ, ասել է ՌԴ նախագահի մամուլի քարտուղար Դմիտրի Պեսկովը:

«Ռուսաստանը տարածաշրջանում կարգուկանոն հաստատելու կողմնակիցն է», - նշել է նա:

Պեսկովը հավելել է, որ ասելիք չունի Սիրիայի նախագահ Բաշար ալ Ասադի՝ Հալեպում ստեղծված իրավիճակի ֆոնին շտապ Մոսկվա այցելելու վերաբերյալ:

Իրավիճակին անդրադարձել է նաև Իրանի ԱԳՆ-ն:

Երկրի արտգործնախարարության խոսնակ Էսմայիլ Բաղային, մեկնաբանելով Սիրիայի վերջին երկու օրերի իրադարձությունները, զգուշացրել է Սիրիայում թաքֆիրական ահաբեկիչների գործունեության վերսկսման մասին և կոչ է արել վճռական և համակարգված գործողություններ ձեռնարկել՝ կանխելու ահաբեկչության տարածումը տարածաշրջանում։

Բաղայը խստորեն դատապարտել է ահաբեկչության բոլոր ձևերն ու դրսևորումները և վերջին երկու օրերին Սիրիայում ահաբեկչական խմբավորումների տեղաշարժերն անվանել է որպես Արևմտյան Ասիայի տարածաշրջանը ապակայունացնելու՝ ահաբեկչական ռեժիմի և ԱՄՆ-ի չարաբաստիկ ծրագրի մաս, հաղորդում է IRNA-ն:

Նա նշել է, որ Աստանայի գործընթացի երաշխավոր երեք երկրների (Իրան, Թուրքիա և Ռուսաստան) միջև առկա պայմանավորվածությունների համաձայն, Հալեպի և Իդլիբի ծայրամասերը համարվում են դեէսկալացիայի գոտիներ, և ահաբեկչական խմբավորումների հարձակումն այդ տարածքների վրա համարվում է պայմանավորվածությունների կոպիտ խախտում։

Իրանի ԱԳՆ խոսնակը նախազգուշացրել է, որ Սիրիայում ահաբեկչական շարժումների դեմ պայքարի ցանկացած հետաձգում կվտանգի վերջին տարիներին ահաբեկչության դեմ պայքարում ձեռք բերված բոլոր ձեռքբերումները և կստիպի տարածաշրջանին մտնել նոր դարաշրջան, ինչպես նաև կառաջացնի անապահովություն և անկայունություն: