Ադրբեջանցիների կողմից ճանապարհ փակելու փորձերը, ի դժբախտություն մեզ, շարունակվելու են. Գառնիկ Դանիելյան

Նախօրեին ՀՀ ԱԺ «Հայաստան» խմբակցության պատգամավորները եղել են Գեղարքունիքի մարզի մի շարք սահամանամերձ գյուղերում և տեղում ծանոթացել ստեղծված իրավիճակին, մարդկանց խնդիրներին ու ապրելու պայմաններին:

Yerevan.Today-ի հետ զրույցում խմբակցության պատգամավորներից Գառնիկ Դանիելյանը նշեց, որ այցելության ընթացքում սեպտեմբերի 13-ից հետո ի հայտ եկած բազմաթիվ անվտանգային և սոցիալ-տնտեսական խնդիրներ են արձանագրել, որոնք լուծելու համար, ինչպես գյուղացիներն են նշել՝ պետության կողմից որևէ աջակցություն չեն ստացել:

«Բազմաթիվ համայնքներում սեպտեմբերի 13-ից հետո զրկված են խմելու ջրից, ջրի ակնուքներն Արդրբեջանի վերահսկողության տակ են, և շատ այլ խնդիրներ կան, որոնք այդ գյուղերի համար օրհասական նշանակություն ունեն: Ամսի 13-ից հետո մարդիկ զրկվել են նաև իրենց անասուններին արոտավայր տանելուց, ձմեռվա խոտի պաշարներ հավաքելուց»,- նշեց պատգամավորը և հավելեց, որ լուրջ խնդիր է նաև ապաստարանների հարցը:

Գյուղացիները պատգամավորներին նաև ասել են, որ բազմաթիվ դիեր կան, որոնք մնացել են միջդիրքային տարածքներում և չեն կարողանում այնտեղից վերցնել իրենց երեխաների մարմինները պատշաճ հուղարկավորելու համար. «Մենք նաև այցելել ենք  զոհվածների և անհետ կորածների ընտանիքներ, և իրենք նշում էին, որ որևէ քայլ չի անում պետությունը, որ հնարավորություն ունենան պատշաճ հուղարկավորել իրենց դիերը: Չնայած իրենք միջոցներ են ձեռնարկել, դրոն վարձել և կարողացել են ֆիքսել մարմինները, թե դրանք, որ հատվածներում են գտնվում»: