Եթե տեսաերիզներ չկան, դա դեռ չի նշանակում, որ սա եզակի դեպք է, նրանք միշտ են այդ կերպ վարվել, և շարունակելու են յուրաքանչյուր հայի նկատմամբ: Yerevan.Today-ի հետ հարցազրույցում այս տեսակետը հայտնեց Ադրբեջանի հարցերով փորձագետ Արմինե Ադիբեկյանը՝ անդրադառնալով թշնամու կողմից տարածված տեսանյութին, որտեղ հայ ռազմագերիններին գնդակահարում են:
Փորձագետը վստահ է, որ չպետք է Հայաստանը սպասի միջազգային հանրության արձագանքին, այլ պետք է կոնկրետ պատասխան միջոցների դիմի:
«Սա կլինի այնքան ժամանակ, քանի դեռ ադրբեջանցին հնարավորություն ունի, քանի դեռ թշնամու ձեռքը հասնում է հայի կոկորդին: Սա Հաագայի թեմա է, ՀՀ-ն պետք է դիմի միջազգային դատարան: Կարևոր հարց կա՝ միջազգային դատարանը գործը հետ է գցելու տասնյակ տարիներ, որովհետև հիմա միջազգային հանրությունն Արդբեջանից ստանալու բան ունի՝ կոնկրետ դա էներգառեսուրսներն են: Նրանց համար շատ ավելի նախընտրելի է իրենց միջին վիճակագրական քաղաքացու ձմեռվա չմրսելը և ձեթ ունենալը, քան՝ անհայտ սարերում կորած հայի կյանքը: Եվ բնական է՝ հիմա նրանք Ադրբեջանի դուդուկի տակ են պարելու»,- ասաց Ադիբեկյանը:
Ինչ վերաբերում է այսօր Նիկոլ Փաշինյանի ընտանիքին պատկանող կայքի հրապարակմանը, որտեղ գաղտնազերծվել է Ադրբեջանի առաջարկած հինգ կետերը, մեր զրուցակիցը նկատում է.
«Այդ քարտեզներով Հայաստանի զգալի մասը չի ներառվում: Խոսքը գնում է Տավուշի, Սյունիքի, Գեղարքունիքի մասին: Ադրբեջանիցները հետ քաշման միտք չունեն, առաջ շարժվելու միտք ունեն: Ալիևը ուզում է Հայաստան գոյություն չունենա: Սա շատ պարզ և հստակ անթաքույց ծրագիր է, որը մարդն իրականացնում է ՀՀ իշխանությունների հանդուրժող կեցվածքի ներքո: Նրանք ցանկանում են ամբողջ Սյունիքը, որն անվանում են Արևմտյան Զանգեզուր, որը նրանք օտարելու են: Իրենց ասած 1920 թվականի քարտեզում Սյունիքի զգալի հատվածը հայկական չէ: Սարսափելին այն է, որ հայկական կողմը ոչինչ չի անում դիմադրելու այդ ագրեսիային: Այս իշխանությունները ոնց դավաճանեցին արցախահայությանը, նույն կերպ դավաճանելու են սյունեցիներին»:
Հարցազրույցը՝ տեսանյութում:
* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը