Ռեկտորները կանչվել են նախարարի մոտ․  Բուռն քննարկումն ավարտվել է զրո արդյունքով

Ուրբաթ օրը ԿԳՄՍ  նախարար Վահրամ Դումանյանը անսպասելի զանգերով  իր մոտ է կանչել  պետական  բոլոր բուհերի ռեկտորներին։ Ասվել է, որ «Բարձրագույն կրթության և գիտության մասին» աղմկահարույց օրինագիծն է ուզում քննարկել։  Նորանշանակ նախարարի կաբինետում  փակ հանդիպումն անցել է  բավականին թեժ մթնոլորտում և ինչպես ներկաներից մեկը հայտնեց Yerevan.Today-ին`  բուռն քննարկումը, ի վերջո, ավարտվել է զրո արդյունքով։ Այսինքն` վիճարկելի կետերի շուրջ  կոնսենսուս այդպես էլ չի եղել, կողմերը մնացել են իրենց կարծիքին։

Իսկ այս օրինագծի ամենախոցելի կետը, հիշեցնենք, բուհական ինքնակառավարումը վերացնելու Կառավարության միտումն է։ Հեղափոխական իշխանությունը ի սկզբանե իմիտացիա էր անում, թե պայքար է մղում  կրթական համակարգը ապաքաղաքականացնելու համար, բայց այսօր իրողությունն ապացուցում է հակառակ պատկերը։  Հապճեպ անցկացվող օրինագծով հեռացող վարչապետը ուզում է բուհերի կառավարումը վերցնել իր թիմի ձեռքը։

Բանն այն է, որ նոր օրենքով ռեկտորների ընտրության իրավունքը խլվում է բուհական կառավարման խորհուրդների ձեռքից, փոխարենը ռեկտորի պաշտոնը դառնում է  նշանակովի մարմին, ըստ այդմ ՝ ԿԳՄՍ  նախարարն է դառնում  բոլոր բուհերի  ռեկտորներին նշանակող անձը։

Մամուլն արդեն գրել է, որ Փաշինյանը ցանկանում է մայր բուհի ռեկտոր նշանակել իր կուսակցին`  ԿԳՄՍ նախկին նախարար Արայիկ Հարությունյանին և հիմնավոր կասկած կա, որ այս օրինագծով   ռեկտորի համար պահանջվող չափանիշները հատուկ նվազեցվել են՝ հասցնելու նրա թույլ կարողություններին։  Թերևս սա է պատճառը, որ իշխանությունը  հակասահմանադրական ճանապարհով երկուս ու կես տարի ԵՊՀ ռեկտորի աթոռը զավթելուն տարբեր պլաններ մշակեց։  Եվ ահա չարաբաստիկ օրինագծի  անցկացումը բորբոքել է  բուհական համայնքների ներկայացուցիչներին։

Նախարար Դումանյանը  3 ժամ տևած հանդիպումը անցկացրել է, որպեսզի համոզի ռեկտորներին  կանխել բողոքի ակցիաները և խուսափել աղմուկ բարձրացնող միջոցառումներից։  Սակայն ռեկտորները  կատեգորիկ դեմ են արտավայտվել նոր օրինագծին և նրբորեն հասկացնել են  վերադասին իրենց վրա հույս չդնել։  Հանդիպման ամենաուշագրավ դրվագն այն է, որ   նախարարը զենքերը վայր է դրել և խոստովանել է քողարկված քաղաքականության քայլերի մասին։

Բայց նրա աբսուրդային ձևակերպումը հնչել է մոտավորապես այսպես` «Անհանգստանալու կարիք չկա, օրենքի փոփոխությամբ ԿԳՄՍ նախարարն իր վրա կվերցնի ռեկտորի նշանակման բեռը  բացառապես այս պահին թափուր պաշտոնների դեպքում»։  

ԵՊՀ ռեկտորի հաստիքն է մեկ տարուց ավելի թափուր պահվել, հիշեցրել են ներկա գտնվողները․ նախարարը լռությամբ հաստատել է , որ  այո, բոլոր ջանքերը հենց մայր բուհին տիրանալու համար են։

Սյուզի Բադոյան