Չեմ կարծում, որ արտաքին աշխարհում կա որևէ լուրջ մարդ, ով շարունակում է Փաշինյանին վստահել։ Այս մասին 5-րդ ալիքին տված հարցազրույցում ասել է ՀՀ երկրորդ նախագահ Ռոբերտ Քոչարյանը։
«Չեն վստահում, բայց փորձում են օգտագործել և բարեհաջող օգտագործում են։ Եվրամիության, մեղմ ասած, կուտը Հայաստանի իշխանությունն ուտում է։ Այն, ինչ կատարվեց Ուկրաինայում դաս չեղավ Հայաստանի համար։ Ուրիշի շահերի սպասարկման դառը համը ուկրաինացիք զգացել են և խելոք մարդիկ սովորում են ուրիշների փորձի վրա, այլ ոչ թե սեփական»,- ընդգծել է նախագահը։
Անդրադառնալով տարածաշրջանային խնդիրներին՝ երկրորդ նախագահը կոչ արեց մտածել Հայաստանի շահերի և ՀՀ անվտանգության մասին. «Եկեք փորձենք հասկանալ այս տարածաշրջանում ո՞ր երկրներն են սպառնալիք Հայաստանի Հանրապետության համար։ Ո՞ր երկրներն են, որ աչք ունեն մեր տարածքների նկատմամբ: Ուղիղ սպառնալիք են Թուրքիան, Ադրբեջանը։ Ադրբեջանը ամենից բարձր մակարդակով հայտարարում է, որ Սևանը իրենցն է, Երևանը Էրիվան է, ադրբեջանական քաղաք է, Զանգեզուրը ադրբեջանական է։ Հաջորդ քայլով պետք է հասկանանք, իսկ ո՞ր երկիրն է, որ ընդունակ է, այդ կարողությունը ունի և այդ շահերը ունի տարածաշրջանում, որը կարող է զսպել Ադրբեջանին և Թուրքիային։ Ոնց պտտվեք, այդպիսի մի երկիր կա՝ Ռուսաստանը։
Հաստատ Ֆրանսիան չի, Ֆրանսիան այստեղ կենսական շահեր չունի, Ֆրանսիայի բանակը 200 հազար մարդ է, որից մարտական պատրաստվածություն հողի վրա ունի ընդամենը 50000 մարդ, այդքանն էլ չկա այսօր։
Ադրբեջանին և Թուրքիային զսպելու միակ հնարավորությունը Ռուսաստանն է և շահերն են Ռուսաստանինն այստեղ։ Հմուտ ղեկավարը նման դեպքում փորձում է այնպիսի հարաբերություններ կառուցել այն երկրի հետ, որի հնարավորությունները զսպելու սպառնալիքները կաշխատեն Հայաստանի Հանրապետության համար»։
Մանրամասն՝ տեսանյութում։
