ԱՄՆ նախագահ Դոնալդ Թրամփը և Իսրայելի վարչապետ Բենիամին Նեթանյահուն քննարկել են Իրանի դեմ նոր հարվածներ հասցնելու հնարավորությունը՝ երկու երկրներում էլ կայանալիք ընտրություններից առաջ։ Այս մասին, հղում կատարելով մի քանի աղբյուրի, գրում է Axios-ը։
Նշվում է, որ Թրամփի հետ զրույցում Նեթանյահուն հայտնել է իսրայելական հետախուզության նոր տեղեկությունների վերաբերյալ իր մտահոգությունը։ Ըստ այդ տեղեկությունների՝ Իրանը քայլեր է ձեռնարկում իր միջուկային ծրագրի վերականգնման ուղղությամբ։
«Թվում է՝ Բիբին ցանկանում է կրկին գործել։ Նա մի քանի անգամ այդ մասին խոսել է նախագահի հետ, և նախագահը պատասխանել է. «Դե՛, Բիբի, պատրաստվիր»։ Բայց որևէ կոնկրետ խոստում չկա։ «Պատրաստվիր» կարող է նշանակել՝ հիմա, ավելի ուշ, կամ էլ՝ երբեք»,- լրատվամիջոցին հայտնել է ամերիկացի պաշտոնյան։
Մեկ այլ պաշտոնյա էլ ասել է, որ Նեթանյահուն վստահ է՝ «իր ուժը պատերազմական ժամանակաշրջանի վարչապետ լինելու մեջ է»։
Նշենք, որ Իսրայելում խորհրդարանական ընտրությունները կանցկացվեն հոկտեմբերի 27-ին, իսկ ԱՄՆ Քոնգրեսի միջանկյալ ընտրությունները՝ նոյեմբերի 3-ին։
