Այսօր արտակարգ իրավիճակ է ստեղծվել Լոռու մարզում։ Shamshyan.com-ի հաղորդմամբ, ժամը 14:00-ի սահմաններում Վանաձոր-Ալավերդի ավտոճանապարհի Փամբակ գյուղի տարածքում գործող գազալցակայանի մոտակայքում ջրատարի վթարի հետևանքով ավազահողային զանգվածը ջրի արտահոսքի և լվացման պատճառով սահել է դեպի երկաթգիծ։
Դրա հետևանքով երկաթգծի մոտ 100 գծամետր հատվածը և մոտ 100 խորանարդ մետր հողազանգված լցվել է երկաթգծի կողային հատվածներում, ինչի պատճառով էլ երկաթգծով գնացքների տեղաշարժը դարձել է անհնար։
Ժամանել են «Հարավկովկասյան երկաթուղի», «Վեոլիա ջուր» ընկերությունների ներկայացուցիչները։ Տեղում աշխատում են նաև ջրմուղի մեծ թվով աշխատակիցներ։ Դեպքի մասին տեղեկանալով՝ Լոռու մարզպետ Արմեն Մկրտչյանի հանձնարարականով ժամանել են նաև մարզպետարանի համապատասխան վարչության ծառայողները։
Այս պահին ջրի արտահոսքը ժամանակավորապես դադարեցվել է և իրականացվում են վթարավերականգնողական աշխատանքներ։
Ըստ նախնական տեղեկությունների՝ բարեբախտաբար տուժածներ չկան։
«Վեոլիա ջուր» ընկերությունն ավելի վաղ հայտնել էր, այսօր առավոտյան 2 հատվածում վթարվել է «Նովոսելցովո-Վանաձոր» 1000 մմ-ոց մայրուղային ջրատարը: Այստեղից են ջուր ստանում Վանաձոր քաղաքի մեծ մասն ու հարակից 12 բնակավայր: «Վեոլիա Ջուր» ընկերության «Վանաձոր» շահագործման տեղամասն անմիջապես մեկնել է վթարի վայր, հայտարարվել է ջրանջատում և սկսվել են վթարավերացման աշխատանքները: Փամբակ-Վանաձոր ճանապարհահատվածում ջրատարի «կարն» էր պոկվել, որը Վեոլիա թիմը վերականգնել է եռակցման միջոցով: Առավել բարդ է եղել Փամբակ-Վահագնաձոր ճանապարհահատվածի վթարը. այստեղ խողովակի վրա մոտ 4,5 մետրանոց ճեղք է առաջացել: Այս պահին մասնագետները շարունակում են աշխատանքը՝ խնդիրը լուծելու և ջրատարը նորից վերագործարկելու համար:
