Ձայների շուրջ 50 տոկոս հաշվարկի համաձայն` կանխատեսվում է, որ Հունգարիայի Տիսա կուսակցությունը խորհրդարանում կստանա 2/3-րդի մեծամասնությունը։
Հունգարիայի Ազգային ընտրական գրասենյակի տվյալներով՝ Հունգարիայի խորհրդարանական ընտրություններին ընտրողների մասնակցությունը տեղական ժամանակով ժամը 18:30-ի դրությամբ (Երևանի ժամանակով ժամը 20:30-ի դրությամբ) կազմել է 77.8%։
Վերջին տվյալների համաձայն՝ քվեարկել է ավելի քան 5.8 միլիոն մարդ։ Նախորդ՝ 2022 թվականի ընտրություններում, այս ժամին մասնակցությունը կազմել է 67.8%։
Տեղական ժամանակով ժամը 17:00-ի դրությամբ (Երևանի ժամանակով ժամը 19:00-ի դրությամբ) մասնակցությունն արդեն գերազանցել էր 2022 թվականի ընդհանուր ցուցանիշը, որը կազմում էր մոտավորապես 70.2%։
Հունգարիայում ընթանում են խորհրդարանական ընտրություններ: Խորհրդարանում կա 199 տեղ, որոնք բաշխված են երկու եղանակով՝ 106-ը՝ մեծամասնական ընտրակարգով՝ միամանդատ ընտրատարածքներում, և 93-ը՝ համամասնական ընտրակարգով՝ կուսակցական ցուցակների հիման վրա: Ազգային ընտրական գրասենյակի տվյալներով՝ քվեարկելու իրավունք ունեն ավելի քան 8.12 միլիոն հունգարացի քաղաքացիներ՝ թե՛ երկրի ներսում, թե՛ դրսում:
Վարչապետ Վիկտոր Օրբանի «Ֆիդես» կուսակցությունը և նրա կրտսեր կոալիցիոն գործընկեր Քրիստոնեա-դեմոկրատական ժողովրդական կուսակցությունը մասնակցում են ընտրություններին: Նրանք երաշխավորում են Հունգարիայում խաղաղություն, անվտանգություն և կայունություն: Նրանց հիմնական մրցակիցը «Տիսա» կուսակցությունն է, որը նպատակ ունի ավելի սերտ համագործակցություն հաստատել ԵՄ-ի և ՆԱՏՕ-ի հետ, քան Օրբանի օրոք: Մասնակցում են նաև ծայրահեղ աջ «Մեր հայրենիք» կուսակցությունը, ձախակողմյան «Դեմոկրատական կոալիցիան» և երգիծական «Երկպոչ շուն» կուսակցությունը: Խորհրդարան մտնելու համար կուսակցական ցուցակը պետք է ապահովի ձայների 5%-ը: Ընտրություններին անդրադարձել է «ՌԻԱ նովոստի»-ն։
