Ռուսական կողմը շահագրգռված է ինքնիշխան և ուժեղ Հայաստանով։ «РИА Новости»-ի հաղորդմամբ՝ դիվանագիտական աշխատողի օրվան նվիրված ընդունելության ժամանակ հայտարարել է ՀՀ-ում ՌԴ դեսպան Սերգեյ Կոպիրկինը։
«Ռուսաստանը լիովին շահագրգռված է ինքնիշխան, ուժեղ և ինքնաբավ Հայաստանով։ Համոզված եմ, որ երկրի լիիրավ մասնակցությունը մեր համատեղ ինտեգրացիոն միավորումներին արդյունավետորեն նպաստում է դրան։ Օրինակ՝ ԵԱՏՄ-ին անդամակցության 10 տարվա ընթացքում Հայաստանի ՀՆԱ-ն աճել է 2,5 անգամ»,- նշել է Կոպիրկինը։
Նա նշեց, որ Հարավային Կովկասի տարածաշրջանը գտնվում է աշխարհաքաղաքական անկայունության տակ։
«Այս բարդ պայմաններում Ռուսաստանի և Հայաստանի հարաբերությունները մտել են փոփոխվող իրողություններին հարմարվելու նոր փուլ։ Առկա մարտահրավերների հաղթահարումը երկու կողմերից պահանջում է երկարաժամկետ քաղաքական կամք և ռազմավարական իմաստություն՝ պահպանելու և բազմապատկելու երկկողմ համագործակցության կուտակված ներուժը»,- ընդգծեց դեսպանը։
Նա հույս է հայտնել, որ այդ ուղղությամբ առաջընթացին լրացուցիչ խթան է հաղորդել Հայաստանի Ազգային ժողովի նախագահ Ալեն Սիմոնյանի վերջերս Մոսկվա կատարած այցը։
«Անցած տարվա արդյունքները հաստատեցին, որ արտաքին ցնցումներին չնայած՝ Ռուսաստանը շարունակում է մնալ Հայաստանի առաջատար առևտրատնտեսական և ներդրումային գործընկերը, երկրի էներգետիկ ու պարենային անվտանգության՝ ժամանակով փորձված երաշխավորը։ Ավանդաբար ակտիվ են եղել մշակութային-հումանիտար և միջանձնային կապերը։ Հատկանշական է, որ ռուսներն առաջատար տեղ են զբաղեցնում Հայաստան այցելող օտարերկրյա զբոսաշրջիկների թվում»,- ընդգծել է դիվանագետը։
Նրա խոսքով՝ Ռուսաստանի և Հայաստանի ժողովուրդների միջև բարեկամությունը «մեզ է փոխանցվել նախնիների սերունդներից, կոփվել է դարերի ընթացքում՝ փառավոր համատեղ հաղթանակներով և ստեղծարար համատեղ աշխատանքով, ամրապնդվել է սերտ միջանձնային կապերով»։ «Մենք կպահպանենք այդ ժառանգությունը և կփոխանցենք ապագա սերունդներին»,- հայտարարել է Կոպիրկինը։
