Միքայել արքեպիսկոպոս Աջապահյանի փաստաբան Մարինե Ֆարմանյանը «Իզմիրլյան» բժշկական կենտրոնի մոտ հավաքվածներին ընթերցեց քաղբանտարկյալ սրբազանի նամակը․
«Մեծ-մեծ շնորհակալություն, և Աստծո բյուր օրհնությունը՝ բոլոր իմ սիրելիներին, ովքեր տարբեր ձևերով և տարբեր եղանակներով շնորհավորեցին նվաստիս ծննդյան տարեդարձը, նամանդավանդ՝ այս դժվարին օրերին բանտարկության և վիրահատության ցավը մեղմացնելով։
Մասնավոր շնորհակալություն իմ բախտակից սրբազան եղբայրներին՝ իրենց բարեմաղթանքների համար։
Խորին հարգանք՝ հիվանդանոցի դիմաց հավաքված սիրելի մարդկանց, ովքեր թեթևացրին հետվիրահատական ցավերս
Աստված օրհնի ձեզ բոլորիդ՝ մեր ժողովրդին, մեր հայրենիքին և մեր սուրբ եկեղեցուն։
Օրհնությամբ՝ Միքայել արքեպիսկոպոս Աջապահյան,
184-րդ օր՝ ապօրինի ազատազրկման»։
Նշենք, որ մի շարք հասարակական-քաղաքական գործիչներ, քաղաքացիներ, հոգևորականներ եկել էին «Իզմիրլյան» բժշկական կենտրոնի մոտ։ Հիվանդանոցում վիրահատվել է Միքայել արքեպիսկոպոս Աջապահյանը, որը քաղաքական դրդապատճառներով դատապարտվել է երկու տարվա ազատազրկման։ Այսօր սրբազանի ծննդյան օրն է, լրացավ նրա 62-ամյակը։
Առավել մանրամասն՝ տեսանյութում։
