«Դատական ակտը, դեռևս չենք ստացել, բայց ունենք հստակ մի հանգամանք իրավական պրոցեսում․ եթե փողերի լվացման դրվագով հիմնավոր կասկածը չհիմնավորեր, ինչին եկել էր օգնության վճռաբեկ դատարանի որոշումը, ապա կալանքը միանշանակ չէին կարող երկարացնել»,- գործարար, բարերար Սամվել Կարապետյանի կալանքը երկու ամսով երկարացնելու՝ դատարանի որոշումից հետո լրագրողների հետ ճեպազրույցում ասաց Կարապետյանի փաստաբան Լիանա Գասպարյանը։
«Դեռևս երեկ ժամը 18։30-ի դրությամբ արդեն իսկ լրատվական ցանցերում, մասնավորապես՝ «Հայկական ժամանակ» օրաթերթը գրել էր, որ կալանքը երկարացվել է։ Դրա մասին մեր անհանգստությունն արտահայտել ենք նաև դատական նիստում, դատարանը վրդովվել է, որ մենք նման չակերտավոր իրականություն բարձրաձայնել՝ ասելով՝ նշվածը ի՞նչ կապ ունի ինձ հետ։ Տեսանք, թե ինչքանով կապ ուներ»,- ասաց փաստաբանը։
Սամվել Կարապետյանի դիրքորոշման վերաբերյալ ասաց․ «Պարոն Կարապետյանը հայտնեց, որ որևէ առնչություն չունի այս ամենի հետ, առաջադրված մեղադրանքները չի ընդունում և որևիցե կերպ, անգամ մեծ ցանկության դեպքում ոչ մի կերպ խոչընդոտելու ո՛չ միտում ունի, ո՛չ՝ նպատակ»:
Հարցին, թե 53 քննիչներից բաղկացած խումբը ի՞նչ քննչական գործողություններ են իրականացրել և ինչպե՞ս է գնահատում նրանց ջանասիրությունը, փաստաբանն ասաց․ «Բավարար ջանասիրության մասին ևս դատական նիստում բարձրաձայնվել է, օրինակ՝ բավարար ջանասիրություն, որպես այդպիսին, թարգմանիչ ներգրավել, փաստաթղթերը թարգմանել և այլն, և այլն, ինչպես նաև կապված այլ մեղադրյալների հետ գործողություն, օրինակ՝ մեկ այլ անձի բնակարանում խուզարկություն։ Սամվել Կարապետյանի վերաբերյալ ոչ մի գործողություն, կես րոպե գործողություն անգամ չի կատարվել, հարգելիներս։ Սամվել Կարապետյանի հետ որևիցե գործողություն մեկ ամսվա ընթացքում չի կատարվել»։
Մանրամասն՝ տեսանյութում։
