Քաղաքագետ Հակոբ Բադալյանը տելեգրամյան իր ալիքում գրում է. «Նիկոլ Փաշինյանը փաստորեն դժգոհում է լրագրողների հետ «անկիրք» ճեպազրույցներից: Իհարկե նա այդ հանգամանքը ներկայացնում է որպես մամուլում շրջանառվող հնչեղ ու աղմկոտ վերնագրերի կեղծ լինելու վկայություն, սակայն նրա հոգսը թերեւս այն է, որ ճեպազրույցներն են «անկիրք»:
Ինչպես առիթ եմ ունեցել գնահատելու, Նիկոլ Փաշինյանի համար աղմուկն ու աժիոտաժը տարերք են: Երբ դրանք չկան, նա հայտնվում է որոշակի հոգեբանական անհարմարավետության շրջանակում:
Պատճառը թերեւս բավականին պարզ է: Փաշինյանն այդ պարագայում ստիպված է ուշադրություն գրավել ոչ թե էպատաժով, աղմուկ-աղաղակով, նախկինների «պորտը տեղը դնելով», այլ՝ բովանդակությամբ: Իսկ այստեղ Նիկոլ Փաշինյանի պաշարը մեծ չէ՝ օբյեկտիվ ու սուբյեկտիվ բազմաթիվ պատճառներով:
Այդպիսով, «կրքի» բացակայությունը Նիկոլ Փաշինյանի համար թերեւս ամենամեծ մարտահրավերն է: Հակառակ պարագայում նա հազիվ թե լրագրողների հետ ճեպազրույցից հետո հարկ համարեր այդ առնչությամբ արտահայտվել սոցցանցերի իր էջում»:
