Բաքվի ծանր հանցագործությունների դատարանը դատավճիռ է կայացրել Էմին Հասիմզադեի քրեական գործով, որը մեղադրվում է «պետական դավաճանության և Ադրբեջանի սահմանադրական կարգի դեմ ուղղված այլ հանցագործությունների մեջ»։
Ըստ ադրբեջանական Report-ի՝ դատավոր Թելման Հուսեյնովի նախագահությամբ տեղի ունեցած նիստում դատարանը Հասիմզադեին դատապարտել է 15 տարվա ազատազրկման։
«Ըստ գործի նյութերի՝ դատապարտյալը Հայաստանին է փոխանցել Ադրբեջանի ինքնիշխանությանն ու պետական անվտանգությանը վնասող տեղեկություններ, սոցիալական ցանցերում հակապետական կոչեր է արել և ազգամիջյան վեճեր հրահրել։ Բացի դրանից, նա մեղադրվում է Շուշի քաղաքից և այլ շրջաններից սոցիալական ցանցերի միջոցով իր հետ կապ հաստատած անձանց ցուցումով լուսանկարներ փոխանցելու մեջ։
Է. Հասիմզադեն Պետական անվտանգության ծառայության կողմից պատասխանատվության է ենթարկվել Ադրբեջանի ՔՕ 274-րդ (Պետական դավաճանություն), 281.2-րդ (Պետության դեմ ուղղված հրապարակային կոչեր) և 283.1-րդ (Ազգային, ռասայական կամ կրոնական ատելության հրահրում) հոդվածներով»,–գրում է ադրբեջանական լրատվամիջոցը։
