Առաջիկա երկու շաբաթվա ընթացքում նախատեսվում է ռուս-ամերիկյան հանդիպում համապատասխան գերատեսչությունների ղեկավարների մակարդակով, կողմերը կքննարկեն երկկողմ հարաբերությունները, այդ շփումը կնախորդի փոխարտգործնախարարների մակարդակով խորհրդակցություններին: Այս մասին հայտնել է ՌԴ փոխարտգործնախարար Սերգեյ Ռյաբկովը։
«Գոյություն ունի սկզբունքային պայմանավորվածություն՝ անցկացնել համապատասխան համապարփակ խորհրդակցություններ։ Պետք է տեղեկություններ ստանալ, թե այս մակարդակում ամերիկյան կողմից ով է հանդես գալու որպես մեր զրուցակից։ Մենք ամերիկացիներին հաստատել ենք մեր պատրաստակամությունը հնարավորինս արագ սկսելու այս աշխատանքը»,- նշել է նա։
Նրա խոսքով՝ հանդիպումը տեղի կունենա երրորդ երկրում, կոնկրետ տեղն այժմ համաձայնեցվում է։
Միևնույն ժամանակ ԱՄՆ պետքարտուղար Մարկո Ռուբիոն հայտնել է, որ երկուշաբթի օրը՝ փետրվարի 24-ին, Ռուսաստան-Ուկրաինա պատերազմից երեք տարի անց, ԱՄՆ-ն ՄԱԿ-ի Գլխավոր ասամբլեային բանաձև կներկայացնի ռուս-ուկրաինական հակամարտության կարգավորման վերաբերյալ։
Ռուբիոն նաև նշել է, որ ՄԱԿ-ի բոլոր անդամները պետք է աջակցեն բանաձևին։
