ԱԺ «Հայաստան» խմբակցության պատգամավոր Գառնիկ Դանիելյանը գրել է․
«Շրջանառության է դրվել մի նախագիծ, որը հանգեցնելու է մարզերում անասնաբուժական լաբորատորիաների փակմանը։
Ամիսներ շարունակ բարձրաձայնել եմ, որ Հայաստանում լաբորատոր հետազոտություններն իրականացվում են ոչ պատշաճ կերպով, գյուղատնտեսական կենդանիների մոտ անկում գրանցվելու դեպքում հաճախ չի հայտնաբերվում որևէ հիվանդություն՝ լաբորատորիաների թերի հագեցվածության, փորձանմուշի և լուծույթի բացակայությամբ պայմանավորված։
Պատկան մարմինների ներկայացուցիչները հավաստիացնում էին, որ ամեն ինչ արվում է լաբորատորիաների հագեցվածության հարցը լուծելու ուղղությամբ։ Մինչդեռ, ստացվում է, որ պետությունը քայլեր ձեռնարկելու, գյուղացուն ձեռք մեկնելու փոխարեն՝ մի բան էլ, վերջնականապես վերացնում է գյուղատնտեսության առաջատար ճյուղերից մեկը։
Ոլորտի բարձիթողի վիճակն արդեն իսկ հանգեցրել է նրան, որ բազմաթիվ ֆերմերներ հրաժարվում են անասնապահությունից, փակում են ֆերմաներն ու մեկնում արտերկիր։ Այս որոշման իրագործման դեպքում ոլորտում տիրելու է խայտառակ քաոս։
Բացի նրանից, որ փակվելու են բազմաթիվ աշխատեղեր, մարզերից՝ փորձանմուշի տեղափոխությունը Երևան լրացուցիչ ֆինանսական բեռ է ստեղծելու։ Առանց այդ էլ, վերջին տարիներին օրեցօր նվազող անասունների գլխաքանակն ու տարածվող հիվանդությունները խիստ մտահոգության տեղիք են տալիս։
Խնդրի կապակցությամբ ուղարկել եմ գրություններ ՀՀ էկոնոմիկայի նախարարությանն ու ՍԱՏՄ-ին՝ պարզելու, թե ի՞նչն է պատճառ հանդիսացել նման անհիմն նախագիծ շրջանառելու համար»։
