Դրական եզրակացություն ենք տվել, քանի որ չի կարող երկիրը մնալ առանց բյուջեի. Գագիկ Մինասյան

Կառավարության ծրագրում հեղափոխական թեզեր էին գործունեության բոլոր ոլորտներում, սակայն այսօր հնչում են բոլորովին այլ գնահատականներ, որ բյուջեն իներցիոն է: Այս մասին նոյեմբերի 13-ին ԱԺ-ում 2019 թվականի բյուջեի նախագծի քննարկման ժամանակ նշեց ԱԺ ֆինանսավարկային և բյուջետային հանձնաժողովի նախագահ, ՀՀԿ-ական Գագիկ Մինասյանը:

«Ո՞ւր մնաց կառավարության ծրագիրը: Կամ մենք պետք է խոստովանենք, որ կես տարի առաջ մենք չէինք պատկերացնում, թե ինչի մասին ենք խոսում, կամ պետք է ասենք, որ ինչ-որ պատճառներով նսեմացնում ենք այն հնարավորությունները, որոնք ունենք: Կամ դրանք պետք է ակնկալենք եկող տարվա 5 ամիսների ընթացքում, որովհետեւ կառավարության ծրագիրը ներկայացվել էր մեկ տարվա համար»,-ասաց նա:

Գագիկ Մինասյանը նկատեց, որ 2017 թվականին գրանցվել է 7,5 տոկոս տնտեսական աճ, որն ամենաբարձրն էր ԵՏՄ-ում և տարածաշրջանում, 2018-ին աճը կանխատեսվում է 6,5 տոկոս, իսկ 2019-ի համար՝ ընդամենը 4,9 տոկոս:

«Որեւէ մեկը չի կարող պնդել, որ ունենք հեղափոխական աճ: Այստեղ իներցիոն բառն էլ տեղին չէ, քանի որ ակնհայտ է, որ կա ռեգրես, անկում: Արդյունաբերության աճը 2019-ին կկազմի 5 տոկոս, իսկ 2017-ին եղել է 6,5 տոկոս: Ծառայությունների ոլորտում աճը 2019-ին կկազմի 5 տոկոս, 2018-ին եղել է 8 տոկոս, իսկ 2017-ին՝ 12,4 տոկոս: Գյուղատնտեսության ոլորտում 2019-ին աճը կկազմի 4 տոկոս, որը գերազանցում է 2017-ի ցուցանիշը, երբ արձանագրվել էր 5 տոկոսից ավելի անկում: Շինարարության ոլորտում կանխատեսվում է 5,5 տոկոսի աճ, 2017-ին աճը կազմել էր 2,5 տոկոս:

Կապիտալ ներդրումների ոլորտում 2018-ին աճը ակնկալվում է, որ կկազմի 32,7 տոկոս, մինչդեռ նույն տարվա առաջին կիսամյակում եղել է 76,1 տոկոսի աճ: Իսկ 2019-ին այդ ոլորտում աճը կկազմի ընդամենը 6,1 տոկոս:

Մասնավոր ներդրումների աճը 2018-ի առաջին կիսամյակում կազմել են 86,9 տոկոս, ամբողջ 2018-ի համար աճը ակնկալվում է 52 տոկոս, իսկ 2019-ին այդ ցուցանիշը կկազմի ընդամենը 3 տոկոս: Ակնհայտ ռեգրեսի հետ գործ ունենք»,-հայտարարեց նա:

Նա նկատեց, որ վարչարարության բարելավման արդյունքում եկամուտները 2019-ին կանխատեսվում է 24 մլրդ դրամ, իսկ 2018-ին եղել է մոտ 20 մլրդ դրամ.

«Կառավարության ծրագրում նշվել է, որ ստվերը 30-40 տոկոս է, բա ուր են այդ ցուցանիշները, որ պետք է ավելացնենք վարչարարությունից: Թե՞ մեր գնահատականներն էին սխալ: Այս տարվա ավարտին հարկային եկամուտները նախորդ տարվա համեմատ աճելու է 1,3 տոկոսով: Բա ո՞ւր է պայքարը կոռուպցիայի դեմ»:

Այդուհանդերձ, Գագիկ Մինասյանն ասաց, որ իրենց հանձնաժողովը դրական եզրակացություն է տվել Բյուջեի նախագծին, քանի որ չի կարող երկիրը մնալ առանց բյուջեի: