29 08 2018

Ամեն ինչ անելու ենք, որ ունենանք ավելի էժան գազի գին. Արթուր Գրիգորյան

Ամեն ինչ անելու ենք, որ ունենանք ավելի էժան գազի գին. Արթուր Գրիգորյան

Պաշտոնի ստանձնումից հետո առաջնահերթ դրել էի ատոմակայանը ժամանակին վերագործարկելու հարցը: Այս մասին օգոստոսի 29-ին պաշտոնավարման 100 օրն ամփոփող մամուլի ասուլիսի ժամանակ ասաց ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը

Նախարարի խոսքով՝ այս տարի էլեկտրաէներգիայի աննախադեպ սպառում է եղե և երբևէ ամռանը այդքան սպառում չի գրանցվել. ամռան երեք ամիսներին օրական ծախսվել է գրեթե 1030 մեգավատ էլէներգիա: «Նման ծախս ունեցել ենք հիմնականում Նոր տարվա օրերին, բայց ամռան ամիսներին նման իրավիճակ չէր եղել և դա պայմանավորված էր հիմնականում շոգ օրերի հետ»,-ասաց նա:

Նախարարը կարևորեց, որ ԲԷՑ-ը ավելի ճիշտ կառավարելու  համար «Տաշիր գրուպ»-ի հետ համաձայնության են եկել, որ այն հանձնվի պետական կառավարման:

Անդրադառնալով էլեկտրաէներգիայի սակագնին՝ Արթուր Գրիգորյնն ասաց, որ Էլեկտաէներգիայի սակագնի վերանայման գործընթաց նախարարությունը չի իրականացնում. դա հանրային ծառայությունները կարագավորող հանձնաժողովի լիազարությունն է, սակայն նախարարությունը չի կարող անմաս մնալ դրանից: Նա հայտնեց, որ Հանրային ծառայությունները կարգավորող հանձնաժողովը 2019 թվականի փետրվարին կվերանայի էլեկտրաէներգիայի սակագինը:

Արթուր Գրիգորյանի խոսքով՝ այսօր ունենք քսանյոթ մետաղական հանքավայրերի շահագործման համար տրված լիցենզիաներ, և ուսումնասիրությունների արդյունքում տասը հանքավայրերին արդեն տրված են զգուշացումներ, քանի որ ուսումնասիրությունը ցույց տվեց, որ շահագործումն իրականացվում է օրենքով սահմանված չափանիշներից դուրս: Նա նաև նշեց, որ ոչ մետաղական 146 հանքավայրերին տրվել են զգուշացումներ:

Անդրադառնալով Թեղուտի խնդրին՝ նախարարն ասաց, որ Կառավարությունն առանձնահատուկ մոտեցում է  ցուցաբերում, և խնդիրը հիմնականում պոչամբարի պատվարի շինարարական ռիսկերի հետ է կապված:  «Որպեսզի ճիշտ գնահատվի իրավիճակը ժամանակավոր դադարեցվել է շահագործումը: Դա ցավալի իրավիճակ է, քանի որ ութ հարյուր աշխատակից անգործ է մնացել, մենք մտահոգ ենք այդ առումով և հնարավորինս արագ փորձելու ենք լուծումներ տալ ՝ հաշվի առնելով նաև ռիսկերը, բայց մեզ համար առաջնահերթ է մնում հանքավայրի շահագործման անվտանգության խնդիրը»,- ասաց նա:

Անդրադառնալով «Լիդիան Արմենիա» ընկերության աշխատանքներին՝ Արթուր Գրիգորյանն ասաց, որ բնապահպանության և ընդերքի տեսչության կողմից կատարվում են ուսումնասիրություններ: «Այս իրավիճակը ցավոտ ենք գնահատում: Մենք պետք է ամեն ինչ անենք, որ չխաթարենք ներդրողի կողմից կատարված աշխատանքը և առհասարակ Հայաստան եկող ներդրումները, պետք է շատ զգուշավոր լինենք և չպետք է մոռանանք նաև բնապահպանական  խնդիրները»,- ասաց նա:

Հարցին, թե հայ-ռուսական հարաբերությունների լարված իրավիճակը կարող է ազդել գազի գնի վրա, նախարարն ասաց. «Մենք ամեն ինչ անելու ենք, որ ունենանք ավելի էժան գազի գին, քան այսօր ունենք»,-ասաց նա:

Անդրադառնալով իրանական կողմի հետ բանակցություններին՝ Արթուր Գրիգորյանը հայտնեց, որ էներգետիկայի նախարարի հետ ունեցել են մի շարք քննարկումներ և հարց է բարձրացվել իրանական կողմից հնարավոր էժան տարբերակով գազի վաճառքի մասին:

«Մեր կողմից մեր քայլն արել ենք, որ մեզ գազի գնի մասով առաջարկություն տան, առայժմ չունենք այդ առաջարկությունը, բայց ամենօրյա ռեժիմով համագործակցության մեջ ենք, քանի որ էլեկտրաէներգիայի դիմաց գազ ենք ներկրում, և կարծում եմ՝ շուտով կունենանք վերջնական հայտարարված գինը, որը համեմատության մեջ կլինի ռուսական գազի գնի հետ»,-ասաց նա:

Ինչ վերաբերում է գազի գինը սահմանին և սպառողին բոլորովին այլ գնով հասնելու խնդրին, նախարարն ասաց, որ ՀՀ-ում գազը սահմանի վա ձեռք է բերում 150 դոլարով, և ՀՀ ներսում վաճառք է իրականացնում միջինացված շուրջ 255 դոլար, և դրանից 47 դոլարը ավելացրած արժեքի հարկն է:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ