Ռուբեն Վարդանյանը գնել է «Ատլանտի» բիզնես ֆորումի 50 տոկոսը

Ռուբեն Վարդանյանը դարձել է «Ատլանտի» գործարար համայնքի գործընկերը: Գործընկերության շրջանակում նոր ընկերություն կստեղծվի: Այս մասին հայտնել է Ռուբեն Վարդանյանը «Ատլանտի»-ի հիմնադիր Միխայիլ Վորոնինի հետ մամուլի ասուլիսի ժամանակ, հաղորդում է Forbes-ը:

«Սա հավասար գործընկերություն է՝ 50-50, ես բիզնեսի մեջ եմ մտնում cash-in-ի պայմաններով»,- հայտնել է Ռուբեն Վարդանյանը:

Ներդրումների չափը գործընկերները չեն բացահայտել, սակայն Ռուբեն Վարդանյանի խոսքով՝ «գումարը մեծ չէ»: Գործարքի պայմաններին ծանոթ աղբյուրն այն գնահատել է 10 միլիոն դոլար: Նշվում է, որ գումարի գրեթե ողջ մասը կծառայի «Ատլանտի» բիզնես համայնքի ենթակառուցվածքի զարգացմանը և նոր կրթական արտադրանքների ստեղծմանը: Միխայիլ Վորոնինը, Ռուբեն Վարդանյանի խոսքով, «ոչ մեծ վճար» կստանա:

Հայ գործարարը հավելել է՝ ֆորումի շրջանակում բիզնես գաղափարները ֆինանսավորելուց բացի, ինքը գործընկերոջ հետ կկիսվի երկար տարիների փորձով և ունեցած գործարար կապերով, որոնք կարող են օգտակար լինել համայնքի ընդլայնման համար: Բիզնես ակումբը կշարունակի մնալ համայնքի հիմքը, ենթադրվում է՝ տարբեր ձևաչափերում ակումբի շփումների հարթակներից մեկը կլինի «Ռոմանով Դվոր» բիզնես կենտրոնը: Դրա համար կօգտագործվի հարթակների մի մասը, որն ազատել է «Սբերբանկ»-ը:

«Ատլանտի» գործարար համայնքը ստեղծվել է 2012 թվականին: Բացի համանուն բիզնես ակումբից և ֆորումից, համայնքն անցկացնում է նաև Winning the hearts ֆորումը: