11  06  2018

Ֆինանսների նախկին նախարարը՝ տնտեսության զարգացման տեմպի, հարկային օրենսգրքում փոփոխությունների մասին

Ֆինանսների նախկին նախարարը՝ տնտեսության զարգացման տեմպի, հարկային օրենսգրքում փոփոխությունների մասին

Մինչև տարվա վերջ հնարավոր կլինի ապահովել պետական բյուջեով նախատեսված 4,5 տոկոս տնտեսական աճը: Այս մասին հունիսի 11-ին լրագրողների հետ հանդիպման ժամանակ ասաց ֆինանսների նախկին նախարար Վարդան Արամյանը: Նրա խոսքով դեռևս ունենք բարձր տնտեսական ակտիվության ցուցանիշի տեմպեր, թեև ապրիլյան դեպքերի ժամանակ որոշակի դանդաղում տեղի է ունեցել, բայց դա նորմալ է, քանի որ տարբեր երկրներում ցույցերը, հավաքները ազդում են սպառման ու տնտեսվարողների վարքի վրա:

Արամյանը նշեց, որ ըստ էության, տնտեսական քաղաքականության կուրսը շարունակում է նախորդը, հետևաբար, տնտեսական կանխատեսված աճի ցուցանիշը կապահովվի: Նա անդրադարձավ նաև խոշոր սուպերմարկետների դեպքում նախկինում եղած պայմանավորվածություններին:

«Այն ժամանակ ընտրվել է մի ուղղություն, որի շնորհիվ գյուղատնտեսական ապրանքաշրջանառությունը որևէ կերպ փաստաթղթավորվի: Լավ էր, թե վատ, դա հարցի երկրորդ կողմն է: Սա գալիս է նրանից, որ գյուղատնտեսության ոլորտը ներկայումս շահութահարկով չի հարկվում: Սա ստեղծում էր խեղումներ տնտեսության մեջ: Կարծում եմ, որ ապագայում անխուսափելի է, որ գյուղատնտեսության ոլորտը պետք է բերվի հարկման դաշտ»,- ասաց Վարդան Արամյանը:

Նախկին նախարարը նշեց, որ եթե կա գրված օրենք, պետք է գնալ օրենքի հետևից: Եթե կարիք լինի օրենսդրական դաշտի վերանայման, ապա պետք է դա արվի: «Եկամտային հարկի, շահութահարկի և այլ հարկատեսակների դրույթների քաղաքականությունը ձեռք տալուց առաջ մեջ աշխատանք պետք է տարվի: Եկամտային հարկը նվազեցնելով հնարավոր է առաջանան ծախսեր, և տարբերություն չկա՝ եկամուտ ես վերցնում, թե ծախս ես առաջացնում: Որպեսզի վերաիմաստավորվի Հարկային օրենսգիրքը, առնվազն երեք-չորս ամսվա աշխատանք է պետք կատարել, որպեսզի սխալված չլինենք: Հարկային գործիքը ոչ միայն կարճաժամկետ էֆեկտ է ունենում, այլև՝ միջնաժամկետ ու երկարաժամկետ»,- հավելեց նա:

Անդրադառնալով կուտակային կենսաթոշակային պարտադիր համակարգին՝ Արամյանը նշեց, որ ճիշտ կլինի դա շարունակել: «Դատելով նոր կառավարության գործողություններից՝ մի քանի ազդակ պետք է ընդունենք: Իմ ընկալմամբ, այս կառավարությունը վերահաստատում է, որ կենսաթոշակային բարեփոխումները ճիշտ էին, դրանք անխուսափելի են: Մենք ունենք մի իրավիճակ, որի մասին փաստեց նաև վարչապետը, որ աշխատուժի շուկայում զբաղվածների գերակշիռ մասն արդեն իսկ համակարգի մեջ է, համակարգն արդեն ցույց է տվել, որ կենսունակ է, աշխատում է, կան կուտակված խնայողություններ»,- ասաց Վարդան Արամյանը: Խոսելով հանքաարդյունաբերության մասին, լրագրողները հարցին՝ եթե նոր կառավարությունը որոշի «Ամուլսարը» չգործարկել, ի՞նչ կլինի: Ի պատասխան՝ ֆինանսների նախկին նախարարն ասաց, որ ցանկացած որոշում կայացնելուց առաջ խելամիտ է մեկտեղել դրական ու բացասական հետևանքները՝ հավելեով, որ խիստ վտանգավոր է միայն պոպուլիստական հայտարարությունների հիման վրա որոշումներ կայացնել:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Orphus համակարգ